Монгол улс анх 1964 онд Токиогийн олимпийн наадамд орж байсан билээ. Одоогийн байдлаар Монголын баг тамирчид зуны олимпийн наадмын чөлөөт бөх, жүдо,бокс, буудлагын төрөлд 2 алт, 9 мөнгө, 13 хүрэл, нийт 24 медаль аваад байгаа. 2008 оны Бээжингийн олимпоос жүдогийн төрлөөр Найдангийн Түвшинбаяр улсынхаа анхны алтан медалийг авчирсан. Харин чөлөөт бөхөөр манайхан хамгийн олон олимпийн медаль аваад байна. Тэгвэл Монголын тамирчид “Рио-2016” зуны олимпийн нaадамд оролцох эрхээ авсаар байна. АНУ-ын Лас Вегас хотноо чөлөөт бөхийн насанд хүрэгчдийн дэлхийн аварга шалгаруулах тэмцээн албан ёсоор эхэллээ. Өнөөдөр дэлхийн бөхийн төрлүүдийн нэгдсэн холбоо бусад орны чөлөөт бөхийн холбооны удирдлага, тамирчид, дасгалжуулагчдын дунд “шалгалт” явууллаа. Дэлхийд чөлөөт бөхийн спортоор тэргүүлэгч орнуудаас сонгон шалгаруулалт явуулж Монгол Улс “Рио -2016” олимпийн эрхийн тэмцээнийг эх нутагтаа хүлээн авахаар эрхээ хүртэж өнөөдөр эцсийн “шүүлтэд” орсон. Хуралд Монголын чөлөөт бөхийн холбооны тэргүүн дэд ерөнхийлөгч, УИХ-ын гишүүн Д.Сумьяабазар төлөөлөн оролцсон юм. Уг хурлаар олимпийн эрхийн тэмцээнийг хүлээн авах тухайн орны танилцуулга, ахуй соёл, зан заншил, олон улсын түвшинд хэрхэн өрсөлдөж яваа, олон улсын томоохон тэмцээнийг эх нутагтаа хэдэнтээ хүлээн авсан гэх шалгуурууд багтсан байна.
Уг хуралд орон орны чөлөөт бөхийн холбооны төлөөллүүд оролцож тайлан, танилцуулгаа ирсэн зочдод үзүүлсэн. Манай улсын хувьд 1964 оноос эхлэн олимпод оролцож эхэлсэн бөгөөд 1968 оны Мексикийн Мехико хотноо болсон зуны олимпийн наадмаас эхэлсэн чөлөөтийнхний амжилтыг өнөөдрийн амжилттай холбож Монгол орны зан заншил, ахуй амьдралыг тусган, олон улсын томоохон тэмцээнийг эх нутгийн дэвжээнээ хүлээн авсан үзүүлэлтүүдийг тусгалаа. Монголын чөлөөт бөхийн холбооны хийж гүйцэтгэсэн ажил, амжилт хэтийн бодлогыг дэлхийн бөхийн төрлүүдийн нэгдсэн холбооноос үнэлж “РИО 2016” олимпийн наадмын эрхийн тэмцээнийг Монголын дэвжээнээ хүлээн авах сүүлийн шалгуурт тэнцүүлсэн сайхан мэдээ байна.

Эх сурвалж: Шуурхай.мн