Монгол Улсын Ерөнхийлөгч Ц.Элбэгдорж Өршөөл Үзүүлэх тухай хуульд хориг тавьсан билээ. Уг хоригийг МАХН, МҮАН-ын “Шударга ёс” эвслээс бусад  УИХ-д суудалтай намууд буюу МАН, АН, ИЗНН хүлээж авахаа албан ёсоор зарласан юм.  Уг хоригийг хүлээж авсанаар Ерөнхийлөгч асан, МАХН-ын дарга Н.Энхбаяр ялгүй болох нь хэвээрээ ч шинээр үүсгэн шалгаж буй хэрэг нь хэвээр үлдэнэ. Н.Энхбаярыг МАХН-ын одоо байрлаж буй төв байр гэх цагаан байшинг бусдаас худалдаж авахдаа залилан мэхэлсэн гэх үндэслэлээр шалган, хэрэг үүсгээд буй билээ. Тэгвэл Өршөөл Үзүүлэх тухай хуульд тавьсан хоригийг хүлээж авах нь тодорхой болмогц Н.Энхбаяр маш их бухимдаж эхэлсэн бөгөөд түүнийг нь ч УИХ дахь намынх нь гишүүд ил тод илэрхийлэх болжээ. Өнөөдөр УИХ-ын Хууль Зүйн байнгын хорооны хуралдаан дээр УИХ-ын гишүүн З.Баянсэлэнгэ Ерөнхийлөгчийн тавьсан хоригийг танилцуулахаар орж ирсэн зөвлөх Ч.Өнөрбаяр руу  зайл гэх мэтээр дайрч байв. Мөн үүнтэй холбоотойгоор Н.Энхбаярыг хилээ гаргахгүй байх шийд гарсан тухай эх сурвалж өгүүлж буй бөгөөд түүнийг албадан саатуулж ч магадгүй гэнэ.