Өршөөлийн хуулийн зүйл заалд хэсэгчилж тавьсан Ерөнхийлөгчийн хоригийг намууд хүлээж авах нь тодорхой болмогц "Шударга ёс" эвсэл тав хоногийн завсарлага авлаа.
Өөрт таалагдаагүй шийдвэр гарахын эсрэг хийж болох намуудын анхан шатны арга л даа. Хориг хүчин төгөлдөр болох гэж байгаад МАХН-ын зүгээс тун их санаа зовж байгааг өчигдрийн Байнгын хорооны хурал дээр гаргасан УИХ-ын гишүүн З.Баянсэлэнгийн аяг харуулна.
Хууль зүйн байнгын хорооны хуралдаанаар УИХ-ын гишүүн З.Баянсэлэнгэ нилээд бухимдангуй “Үнэндээ Ерөнхийлөгчийн хориг ард түмнийг талцуулж байна. Ерөнхийлөгч хүн эв эеийг эрхэмлэдэг байтал иргэдээ ингэж талцуулж болохгүй. Улсад 350 тэрбум төгрөг завшсан хэрэгт 112 хүнийг шалгаж байгаа гэж АТГ-аас мэдэгдлээ. Эдгээр хүмүүсээ зарла. Ерөнхийлөгчийн хоригийн зүйл заалт нь санал биш гэж Ерөнхийлөгчийн зөвлөх Ч.Өнөрбаяр хэллээ. Санал биш юм бол бид энд хэлэлцэх шаардлага байна уу” гэв.
Дээрх асуултад Ерөнхийлөгчийн зөвлөх Ц.Өнөрбаяр “Хөнгөн, хүнд, онц ноцтой гэмт хэрэг, авлигын хэрэг энэ бүгдийг нэг уутанд хийж, өршөөл үзүүлэхээр заасан нь бэрхшээлтэй байгаа. Тийм учраас Ерөнхийлөгч хориг тавихдаа зүйл заалт бүрээр нэг бүрчлэн тасалж тавьсан. Бичиг үсэг тайлагдсан хүнд ойлгомжтой” хэмээн хариулт өгөхөд УИХ-ын гишүүн З.Баянсэлэнгэ “Гишүүдийг доромжилдог хэн юм чи. Том зантай амьтан. Зайл. Бичиг үсэгт тайлагдаагүй хүн хэн байгаа юм. Ийм нөхдүүдийг яах гэж танхимд байлгаад байгаа юм, гаргаач" хэмээн яг л гудамжинд байгаа аятай хашгирч бухимдлаа илэрхийлсэн юм. З.Баянсэлэнгэ гишүүний гаргасан ааш аягыг "Шударга ёс"эвсэл яг иймэрхүү байна гээд ойлгочиход нэг их буруудахааргүй шинжтэй.
Дарга нь харь газраас өөрийн биеэр ирж төрийн ордноор "салхилахдаа" нэг насандаа мөрөөдөөд ч олдохгүй байж мэдэх сайдын зөөлөн суудалд суулгаж өгсөн тул ингэж цээжээрээ өмгөөлж хамгаалах нь ч тодорхой.
За тэгээд "Шударга ёс" эвслийн хувьд чаддагаа л хийж тав хоногийн завсарлага авсан. Хэдий болтол завсарлага авах вэ, нэгэнт бусад нам эвслүүд хоригийг хүлээж авна гэдгээ зарлачихсан тул яагаад ч нэмэргүй. Гэхдээ З.Баянсэлэнгэ гишүүний хувьд арга чарга байгаа бололтой. Тэрээр хэлэхдээ АТГ-аас албан тушаалтнуудын хэрэгт 350 тэрбум төгрөгийн хохирол учирсан гээд байгаа, энэ хохирлыг учруулсан хүмүүсийг ил зарла хэмээсэн.
Нэгэнт Н.Энхбаярын холбогдсон хэрэг олон түмэнд ил, нуух зүйлгүй, харин бусад улсад онц хохирол учруулсан албан тушаалтан хүмүүсийн нэрсийг зарлачихвал АН, МАН гэлтгүй бултаараа холбогдож ичсэн нүүрэндээ хоригийг хүлээн авахаас татгалзана гэсэн бусад намынхныг нуман тулгуурт шахах зорилготой аргыг тэр хэрэглэж байна.
Дараагийн нэг арга бол УИХ-ын гишүүн Н.Алтанхуягийн өргөн барьсан Эрүүгийн байцаан шийтгэх хуулийн шинэчилсэн төслийг энэ хоригтой цуг хэлэлцэх ёстой хэмээн З.Баянсэлэнгэ гишүүн зүтгээд байгаа.
Учир нь Н.Алтанхуяг гишүүний хуулийн төсөлд АТГ-ыг даль жигүүрийг нь хугалж, нэр төдий л болгож хувиргах заалтууд агуулагдаж байгаа юм. Тиймээс энэ хуулийг ерөнхийлөгчийн хоригтой зэрэгцүүлж хэлэлцээд баталчихвал АТГ-ыг намнаж орхино, ингэснээр том дайснаа дарж байгаатай адил гэж З.Баянсэлэнгэ тэргүүтнүүд үзэж байгаа бололтой. Нэг ёсондоо АТГ-ыг бас нуман тулгуурт шахах хоёр дахь арга.
Гэх мэтээр Н.Энхбаярын хөтөлж ирсэн улстөрч нь эзнийгээ аврахын төлөө хамаг байдгаараа чармайлт гарган зүтгэж байгааг бид харж байна.
Арга ч үгүй биз дээ. Хэнбугайд ч хүсээд олддоггүй улстөрийн том албан тушаалуудыг ногоон гэрлээр авч өгсөн хүндээ зүтгэх нь ёс байлгүй дээ.
Н.Умард
