Шинэ сайдууд халаа, сэлгээ гээд томилгооны асуудалдаа эргэлт буцалтгүй орлоо. Их хурлын гишүүд яам дээрээ очоод төрийн жинхэнэ албан хаагчдыг халж, сэлгэхгүй байхыг сануулж зургаан сайдад үүрэг өгсөн. Гэвч халаа сэлгээ аль хэдийнээ эхэлсэн бололтой. Сураг сонсоход Барилга хот байгуулалтын яам болон Зам тээврийн яамдуудад "өөрийн хүнээ авдаг компанит" ажил өрнөсөн гэнэ. Барилга хот байгуулалтын яамны төрийн нарийн бичгийн даргаас авахуулаад зарим хэлтсийн дарга нар өөрийн хүсэлтээр өргөдлөө өгсөн сурагтай. Зарим эх сурвалжийн мэдээлж буйгаар дээрээс нь ямар нэгэн байдлаар шахалт үзүүлсэн байж болзошгүй гэв.
Тэгвэл өчигдөр сошиал ертөнцөд нэгэн сонирхолтой томилгооны талаар шуугиан дэгдсэн.Тэр нь Зам тээврийн сайд М.Зоригт нисэхэд Ц.Орхонг буцаан ажилд авлаа гэсэн мэдээлэл байлаа. Тэрбээр, энэ томилгооноосоо болж асуудалд орж ч магадгүй байдал хүрсэн. Зарим нэг хүмүүс түүний үнэхээр энэ томилгоог хийвэл огцруулах асуудлыг ч хөндөж магадгүй гэдгээ илэрхийлсэн. Харин сайд М.Зоригт өөрийн твиттер хуудсаараа дамжуулан "Ц.Орхон бол салбартаа сайн мэргэшсэн залуу, би түүнд итгэж байгаа" гэж хариуллаа. Эндээс үнэхээр ийм томилогоо яригдсан болохоор нь тодорхой болов. Тэр ч бүү хэл мөнгө угаасан хэрэгт холбогдсон хүнийг эргүүлэн томилохдоо итгэлтэй байгаа гэдэг нь илт боллоо. Харамсалтай байна. Харин энэ томилгоог Их хурлын дарга, АН-ын дарга З.Энхболд эсэргүүцэж М.Зоригт сайдыг загнасан.Тэрбээр "Ц.Орхон болон бусад шийтгүүлсэн нөхдөд нисэхийн салбарын хаалга хаагдсан" гэсэн юм.
Тодруулбал, Ч.Хоролсүрэн, Ц.Орхон нар нь “Дайны эрсдэлийн сан” гэх нэрээр мөнгө угаасан хэрэгт гурван шатны шүүхээс ял сонссон хүмүүс. МИАТ компанийн экс удирдлагуудад анхан шатны шүүхээс 10-13 жилийн ял оноогоод байсан. Харин шүүгдэгчид давж заалдсанаар Дээд шүүх ялыг 7-8 жил болж бууруулсан юм. Тэгвэл 2015 оны гуравдугаар сард МИАТ-ийн нэр бүхий удирдлагуудыг эрүүл мэндийн шалтгаанаар хугацаанаас нь өмнө сулласан байдаг. Мөн улсад 6 тэрбум төгрөгний хохирол учруулсан нь тогтоогдсон Ч.Хоролсүрэн хохирлоо нэг сарын дотор төлж барагдуулсан билээ.
Харин энэ томилгооны талаар МИАТ-ийн экс удирдлага Ц.Орхон "Айсан хүнд (хүмүүст) аргал хөдлөнөө гэж. үнэн үг шүү. Тэр албан тушаал дээрээ та нар өөрсдөө л хоорондоо зодолд" гэсэн. Учир нь олон нийт энэ мэдээллийг сонссон даруйдаа Ц.Орхон болон МИАТ-ийн экс удирдлагуудыг буцаан тавих гэж байгааг ихэд эсэргүүцсэн юм.
Энэ төр засаг ямар эмгэнэлтэй бас чадавхигүй байгаа гэдэг нь тодорхой харагдаж байна. Төрийн сайд хүн Монголын хамгийн чухал салбарыг удирдуулах мэргэшсэн мэргэжилтэнгүй болсон байна. Ямар сайндаа л хэрэгт холбогдож байсан хүнийг "сайн мэргэшсэн" гэсэн нэрийдлээр буцаан авах гэж байх вэ дээ . Энэ үйлдлээрээ Зам тээврийн сайд М.Зоригт өөрийгөө л муухай харагдуулаад өнгөрлөө. Ер нь МАН-ын зургаан сайдыг огцруулсан даруйдаа Н.Алтанхуягийн Засгийн газрыг эргүүлэн бүрдүүлчихсэн. Гэнэт халагдсаны тэтгэмжээ аваад явсан хүмүүсийг буцаагаад хуучин ажилд нь томилж байна. Үүний эхлэлийг С.Эрдэнэ сайд Хөдөлмөрийн яамны үүрэг гүйцэтгэгчээр томилогдсон даруйдаа ажлаас халагдсан хууччуулыг нь эргүүлэн дуудсан . Одоо шинэ сайдууд МАН-тай нийлэхээс өмнө "Шинэчлэлийн засгий газар"-т ажиллаж байсан бүх хүмүүсийг буцааж томилох бололтой. Улс төрийн томилгоог иймэрхүү байдлаар хийж байна. Энэ нь эрх баригчидад төрийн хариуцлагатай албыг залгуулаад явах шалгарсан боловсон хүчингүй болсоны илрэл гэлтэй. Сая зургаан сайдыг томилох үед ч ийм зүйл ажиглагдсан. Гаднаас мэдлэг боловсролтой, салбараа аваад явчих чадалтай мэргэжилтэн байхгүй болохоор Ерөнхийлөгчөөсөө хүртэл зөрөн байж "Давхар дээлтэй" сайдуудыг томилсон шүү дээ .. Төрийн алба бол төрийн алба л байх ёстой. Хэн нэгэн сайд, даргын хамаатан садангийн бүрдэл байх ёсгүй.
Г.Ган
Zaluu.com
