УИХ-ын гишүүн О.Баасанхүү тэргүүтэй МАХН-ын гишүүд улс төрийн хилс хэрэгт хэлмэгдэгсдийн хүүхдүүдийн/өндөр настнуудын/ тэтгэврийг нэмэх тухай тогтоолын төслийг энэ сарын 11-нд УИХ-ын дарга З.Энхболдод өргөн барьсан. Ийнхүү 400 орчим ахмад настны тэтгэврийг нэмэгдүүлэхэд улсын төсөвт жилд 500 сая төгрөг шаардлагатай болох юм. УИХ-ын гишүүн О.Баасанхүү ийнхүү тэтгэвэр, тэтгэмжийг нэмэгдүүлэх бүрэн боломжтой гэж үзэж байгаа бол салбарын сайд үүнийг сонгуулийн шоу гэж дүгнэж байна. Ингээд эсрэг тэсрэг байр суурийг хүргэе.
Хүн амын хөгжил, нийгмийн хамгааллын сайд С.Эрдэнэ
Одоогоор улсын төсөв хүндрэлтэй байгаа ч нийгмийн халамж болоод тэтгэврийг цаг хугацаанд нь олгож байна. Жилдээ улсаас зөвхөн тэтгэвэрт л гэхэд 1.3 их наяд төгрөг шаардагддаг. Энэ нь төсвийн багагүй хувийг эзэлж байгаа. УИХ-ын гишүүн О.Баасанхүү нарын ярьж байгаа асуудлыг сонгуулийн популист алхам, шоу гэж харж байна. Ер нь сонгууль дөхөх тусам энэ мэт нийтэд таалагдах гэсэн мэдэгдэл, алхамууд ихэсдэг нь жам ёсны асуудал. Аливаа мэдэгдэл, төсөл өргөн барихын өмнө улсынхаа нийгэм, эдийн засгийг маш сайн судлах ёстой. О.Баасанхүү гишүүнд ямар ч судалгаа, баримтгүйгээр өнгөц харж байна л гэж хэлмээр байна. Сэтгэлийн хөөрлөөр улс төрч болгоны ярьсан хэлсэн бүхнийг хэрэгжүүлнэ ч гэж юу байхав.
УИХ-ын гишүүн О.Баасанхүү
Манай намын зүгээс дахин улс төрийн хилс хэрэгт хэлмэгдсэн хүний хүүхэд гэгдсэн ч тухайн үеийнхний жишгээр овгоо солилгүй нийгмийн бүхий харилцаанд адлагдаж “Эсэргүүний хүүхэд” гэгдэж явсан өдгөө 78-92 насны 400 орчим ахмадад мөнгө олгох хуулийн төсөл санаачилсан. Эдгээр ахмадууд амьдралынхаа ихэнх үед эсэргүү хүний хүүхэд хэмээн хэлэгдэж, хамгийн муу ажил хөдөлмөрийг хийж ирсэн. Одоогоор тэтгэвэрийн мөнгө гэж 207 мянган төгрөг авдаг юм байна. Тэдний тэтгэврийн мөнгөнд сар бүр 100 мянган төгрөг нэмж олгох тухай хуулийн төслийг өргөн барьсан. Улсын төсөвт 400-500 сая төгрөг нэмэгдэнэ гэсэн тооцоо гарсан. Өөдрөгөөр асуудалд хандаж эдгээр ахмадууд 10 жил тэтгэвэр авна гэж тооцоолсон. Гэхдээ биднийг энэ асуудлаар судалгаа хийх явцад 10 гаруй ахмад буурай бурхны оронд морилсон. Тийм болохоор улам л тоо нь цөөрч байгаа тэдний асуудалд монголын төр хариуцлагатай хандаж, багахан цаг хугацаанд ч гэсэн мөнгөн дэмжлэг үзүүлнэ гэж итгэж байна.
М.БОЛОР
