Нийслэлийн Засаг дарга асан Т.Билэгтийн хүүг онц хэрцгийгээр хөнөөсөн хэрэг энэ сарын 20-нд Яргайтын аманд гарсан байна. Гэмт этгээдүүд түүнийг онц хэрцгийгээр хөнөөж улмаар дөрвөн мөчийг нь хутгаар сийчин цогцсыг нь машинд үлдээсэн байхад нь цагдаагийнхан олжээ. Хэргийг ЭЦГ болон УМБГ-ын онц хүнд гэмт хэрэгтэй тэмцэх хэлтсийнхэн шалгаж байгаа аж.
Эх сурвалжийн мэдээлж байгаагаар хохирогчийг өс хонзонгийн сэдэлтэйгээр хөнөөсөн байж болзошгүй гэнэ.
Талийгаачийн аав Т.Билэгт нь Ховд аймгийн уугуул,Налайхын МАХН-ын хорооны нарийн бичгийн даргаас эхлэн дүүргийн Засаг дарга, Нийслэлийн хянан шалгах хорооны дарга, НИТХ-ын Тэргүүлэгчдийн дарга, МУ-ын Ерөнхийлөгчийн тамгын газрын дарга, Нийслэлийн Засаг дарга бөгөөд Улаанбаатар хотын захирагчаар сонгогдон ажиллаж байсан юм.
Ингээд 2012 онд түүнийг албан тушаалаа урвуулан ашиглаж улсад их хэмжээний хохирол учруулсан хэргээр сэжигтнээр татаж байв. Тодруулбал, Т.Билэгтийг албан тушаалын байдлаа урвуулан ашиглаж хоёр тэрбум 125 сая төгрөгийн үнэлгээтэй “Улаанбаатар таймс” сониныг хууль бусаар “Медиа холдинг” компанид Д.Чулуунбаатарын нэрээр хувьчилж, улмаар “Эскон” компанийн охин компани болгон шилжүүлэн, үрэгдүүлж Нийслэлийн өмчид онц их хэмжээний хохирол учруулсан гэмт хэргийг гардан үйлдсэн хэрэгт буруутгасан юм. Ингээд 2014 оны долоодугаар сард болсон шүүх хуралдаанаар түүнд холбогдох хэргийг өршөөлийн хуульд хамруулан хэрэгсэхгүй болгож байв.
Ц.Сонор EAGLE.MN
