Өнөөдөр УИХ-ын намрын ээлжит чуулган нээлтээ хийсэн бөгөөд 14.00 цагаас Засгийн газрын гишүүнийг огцруулах буюу ЗГХЭГ-ын дарга С.Баярцогтыг огцруулах асуудлыг хэлэлцэх юм. Уг асуудлыг Өргөдлийн байнгын хорооны дарга, УИХ-ын гишүүн О.Баасанхүү өргөн барьсан. Гэвч Үндсэн хуулийн цэц уг асуудлыг хууль зөрчсөн гэх дүгнэлт гаргаад буй. Харин С.Баярцогтыг Үндсэн хуулийн цэц, “Шударга ёс эвслийн бүлэг” тэр дундаа МАХН-ын дарга Н.Энхбаяр хамгаалж буй гэх “бор шувуу” Төрийн ордонд нисч эхэлжээ.

 

 

Үүнд УИХ-ын гишүүн О.Баасанхүү, Г.Уянга, УИХ-ын дэд дарга Л.Цог нар ихэд эгдүйцэж Шударга ёс эвслийн бүлгээс гарна гэдгээ бүлгийн хурал дээрээ мэдэгдсэн байна. Уг асуудлаар тун удахгүй мэдээлэл хийх бололтой. Хэрвээ УИХ-ын дэд дарга Л.Цог бүлгээсээ гарвал дэд даргын суудлаа ч мөн өгнө. Тэгэхээр эвслийн бүлэг задрах асуудал яригдана гэсэн үг. Түүнчлэн бүлгийн зарим гишүүд ч эвслийн бүлэг задрах ёстой гэсэн байр суурийг илэрхийлжээ. Хэрэв бүлэг тарвал УИХ-ын гишүүн Ч.Улаан, Д.Тэрбишдагва нар МАН-д орох асуудал ч яригдсан бололтой.