Та хүүхэд насандаа хөгжмийн салбарт орсон. Одоо байгаа Жастин, анх дуу хөгжимд хөл тавьж байсан Жастин хоёр хэр ялгаатай вэ?
Би энэ салбарт 13 настайдаа орсон. Магадгүй тухайн үед хүмүүст таалагдах гэж тэдний дуртай дүрд тоглодог байсан байх. Гэвч одоо бол залхаж байна. Маск зүүхээс залхсан. Одоо байгаа би бол жинхэнэ Жастин.
Дуу хөгжмөөс гадна хайр дурлалын хувьд ч мөн адил залуухан байсан?
Тийм ээ.
Та хайр дурлалаас яг юуг ойлгосон бэ?
Битгий дурла. Худлаа, худлаа, би тоглосон юм. Мэдээж хайраас олон зүйлийг ойлгосон, сурсан. Би найз охинтойгоо 18 настай байхдаа өөрийн гэсэн амьдралаа эхлүүлж байсан. Бараг л гэрлэлт шахуу байсан. Найз бүсгүйтэйгээ хамт амьдарна гэдэг бидний насанд тэр бүр байдаггүй. Гэхдээ бид хоёр бие биедээ үнэхээр их хайртай байсан болохоор юуг ч үл анзааран хамтдаа байсан. Бид хоёр биенийхээ салшгүй нэг хэсэг нь болсон байсан. Бид нэг нэгэндээ ухаангүй дурласан байсан. Магадгүй нэг нэгнээ өөрийнхөөрөө байлгахын тулд муудаж эхэлснээс л бид салсан. Хайр гэдэг бол сонголт болохоос мэдрэмж биш. Хүмүүс хайрыг кино юмуу шидэт үлгэрт гардаг шиг төсөөлдөг. Гэвч үнэндээ тийм биш. Хайртай гээд сонгосон хүнээ зарим тохиолдолд хайрламааргүй санагдах нь бий. Гэхдээ нэгэнт сонгосон бол хайрлах л ёстой.
Магадгүй та үерхсэн, болзсон бүсгүйгээ Селенатай харьцуулах тохиолдол байдаг уу?
Тийм шүү, та харилцаандаа шархтай үлдсэн бол бусад бүсгүйчүүдтэй харилцахдаа ахиж шархлахгүй байхыг л хүснэ.
Та шоронд ороод гарсан, энэ тухайгаа?
Тэр бол зүгээр л цагдаа нарын анхаарлын төвд орох гэсэн үйлдэл. Би хурд хэтрүүлээгүй, согтуугаар жолоо бариагүй. Нэгэн цагдаагийн олны танил хүнийг баривчилж, алдартай болох гэсэн ядмагхан санаа. Цагдаа намайг зогсоогоод согтууруулах ундаа хэрэглэсэн эсэхийг заадаг аппаратанд үлээ гэсэн. Үлээхэд 0.01 гэж гарсан юм. Би өглөөгүүр ганц пиво уусан байсан болохоор тэгж гарсан. Тухайн цагдаа шууд л намайг гараа ардаа ав гэж тулгасан. Түүнээс юу болсон тухай асуухад гараа ардаа авахыг ахиж тулгасан. Би 24 цаг саатуулагдсан. Хамгийн онцгүй нь их хүйтэн байсан даа.
Хоригдох газар хүмүүсийн хувьд тэр үе амьдралынх нь хамгийн муухай дурсамж болдог гэдэг?
Их хүйтэн, бас их тухгүй байсан л даа. Хүсээгүй олон хүн чиний хажууд байна гэдэг сайхан биш шүү дээ. Хоригдож байгаа хүмүүс надад хандаж” Бибер чамд хайртай шүү, цоглог бай” гээд л. Инээдтэй ч юм шиг санагдаж байсан шүү.
И.АВГУСТА
PHOTONEWS.MN
