УИХ-ын чуулганы хуралдаанаар Монгол Улсын 2015 оны төсвийн тодотголыг хэлэлцэж байна. Гишүүд төсвийн тодотголтой холбоотой асуултуудыг Ерөнхий сайд болон Засгийн газрын гишүүдээс тодруулж байна.
УИХ-ын гишүүн Ц.Даваасүрэн: Яамдаа цөөлөх хэрэгтэй. Тухайлбал, Дэд бүтцийн яам гэхэд бялуу хуваалтын үр дүнд дөрөв, Нийгмийн хамгаалал, хөдөлмөрийн яамыг хоёр болгож хуваасан. Эдгээр яамдаа цөөлж, хэмнэлтийг өөрсдөөсөө эхлэх нь зүйтэй. Оны сүүлчээр эдийн засаг их хүндэрнэ шүү. Ирэх оны зургадугаар сараас яамаа цөөлнө гэж байна. Энэ ажлыг яаравчлах хэрэгтэй байна.
УИХ-ын гишүүн Я.Содбаатар: Өвөрхангайн багш нар оны сүүлчээр цалингаа авч чадахгүйд хүрч, 928 сая төгрөг дутаж буй талаар ярьж байна. Үүнийг яаж шийдэх гэж байна вэ.
Сангийн сайд Б.Болор: Улсын эдийн засаг хүнд байгааг хаа хаанаа ойлгож байгаа. Гэхдээ эмч багш, цэрэг цагдаагийнхан цалингаа тогтмол авч байгаа. Ганц нэг хоцорсон тохиолдол гарсан байж магадгүй. Багш нарын цалин он дуустал бүрэн тавигдаад явна. Салбарын яамнаас багш нарын цалингийн асуудлыг тодруулах хэрэгтэй. Сангийн яамны хувьд цаг хугацаанд нь санхүүжилтээ хийгээд явж байна.
УИХ-ын гишүүн Д.Хаянхярваа: “Төрийн албан хаагчдын цалинг бууруулах асуудал байж болохгүй. Энэ бүх хүмүүс чинь цалингаа тооцоолоод орон сууцны зээл авсан байгаа. Алсдаа энэ нь банк санхүүгийн байгууллагуудын үйл ажиллагааг доголдуулах хэмжээнд хүргэх юм биш биз” гэж байлаа. Ерөнхий сайд төрийн албан хаагчийн цалин гэлтгүй ахмад настны тэтгэврийг ч цаг хугацаанд олгох чиглэлийг Засгийн газар барьж ажиллаж байгааг онцолсон бөгөөд мөн эрүүл мэнд, боловсролын салбарт түлхүү анхаарч байгаа гэв.
Сангийн сайд Б.Болор: Төсвийг маш сайн танасан. Ирэх жилийн төсөв дээр алдагдлыг 0 болгох гэж байна. Орон нутгийн хөгжлийн сангийн төсвийн хувийг тодорхой хэмжээгээр бууруулахаар оруулж ирсэн. Энэ сан байх нь зүйтэй. Мөнгөний урсгалыг нэг болгох саналтай санал нэг байна. Сангийн яам концесын ажилд бүрэн дүүрэн орж явж байгаа” гэж хариуллаа.
Харин Ерөнхий сайд Ч.Сайханбилэг: Бид Хаянхярваа гишүүний энэ саналыг дэмжиж байгаа. Өнгөрсөн жил хоёр төсөвтэй байсан. Үүнийг нэг болгосон. Ер нь бид төсвийнхөө бодлогод бүрэн өөрчлөлт оруулах хэрэгтэй байна. Үрэлгэн, иддэг, уудаг төсвөөс татгалзаж бүтээдэг, хийдэг төсөв рүү явж байна.
УИХ-ын гишүүн Д.Батцогт: Эрүүл мэндийн яамны буруугаас эмийн төсөв тасарсан. Тэгсэн хэрнээ буруугаа УИХ-д тохдог. Орон нутагт очихоор иргэд биднээс нэхдэг. Эмийн төсөв нь эрүүл мэндийн яамны хариуцлагагүйгээс болсон. Хамгийн асуудалтай салбар бол эрүүл мэндийн салбар байгаа. Эрүүл мэндийн салбар дампуурж гүйцлээ. Ерөнхий сайдаа би танай Эрүүл мэндийн сайд Г.Шийлэгдамбыг огцруулахаар өргөн барина. Энэ сайдынхаа асуудлыг ойрын үед нэг тийш нь болгоорой. Ийм хариуцлагагүй сайдтай байж болохгүй. Эмийн талаар асуухад урдаас "Эм манай тулгамдсан асуудлуудын 10-т байдаг" гэх юм яриад байж болдог. Ийм сайдтай байж болохгүй. Эрүүл, мэндийн салбарыг бүр хол хаячихсан байна.
Т.Энхэлээ
24tsag.mn
