Сангийн яамнаас өнгөрсөн сарын сүүлээс эхлэн бүх яам, төрийн байгууллагын цалингаас бусад зарлагыг буюу дансыг хаасан. УИХ-ын нэгдсэн хуралдаанаар Монгол Улсын 2015 төсвийн тухай хуульд нэмэлт өөрчлөлт оруулах тухай хэлэлцэж буйтай холбоотойгоор ийнхүү дансыг тодорхой хувиар хаасан гэж тус яамнаас мэгдээд байгаа юм. Хэзээнээс төрийн байгууллагуудын дансыг нээх талаар Сангийн яамны санхүүгийн бодлогын газрын дарга Б.Нямаагаас тодруулахад “Ер нь дансыг бүрэн хаагаагүй. Цалин, тэтгэвэр, тэтгэмжийг хэвийн олгож байгаа. Харин бусад зардлуудыг тодорхой хувиар танаж, хаасан. Одоогоор эхнээс нь дээрх тогтмол, тогтмол бус зардлуудыг олгож эхэлсэн” гэх хариултыг өглөө.
Дашрамд сануулахад, УИХ-ын чуулганы өчигдрийн нэгдсэн хуралдаанаар Монгол Улсын 2015 оны төсвийн тодотголын нэг дэх хэлэлцүүлгийг хийж хоёр дахь хэлэлцүүлэгт бэлтгүүлэхээр холбогдох байнгын хороонд шилжүүлээд буй юм.
“Эдийн засгийн хүндрэлтэй нөхцөл байдал, дэлхийн зах зээл дээрх уул уурхайн түүхий эдийн үнийн уналтаас шалтгаалан энэ оны эхний найман сарын гүйцэтгэлээр нэгдсэн төсвийн тэнцвэржүүлсэн орлого 3 их наяд 576.8 тэрбум төгрөгт хүрч өнгөрсөн оны мөн үеэс 221,2 тэрбум төгрөгөөр, төлөвлөсөн хэмжээнээс 660, 7 тэрбум төгрөгөөр тус тус буусан үзүүлэлттэй гарлаа. Төсвийн орлого ийнхүү буурхад нэмэгдсэн өртгийн албан татвар, гаалийн албан татвар, өмч хувьчлал, газрын тос, аж ахуйн нэгжийн орлогын албан татварын орлогын бууралт гол нөлөө үзүүлсэн. Төсвийн орлогын энэ оны эхний сарын гүйцэтгэлд үндэслэн Монгол Улсын 2015 оны хүлээгдэж буй гүйцэтгэлийг тооцоход нэгдсэн төсвийн орлогын гүйцэтгэл төлөвлөснөөс 900 гаруй тэрбум төгрөгөөр буурна” гэдгийг Ерөнхий сайд Ч.Сайханбилэг төсөвийн тодотгол хэлэлцэх үеэр мэдээлсэн.
Zaluu.com М.БОЛОР
