1944 оны 4 дүгээр сарын 28-нд БНМАУ-ын Ардын сайд нарын Зөвлөлийн тогтоолоор цэргийн гарамгай зүтгэлтэн 11 хөвгүүндээ генерал хэмээх цэргийн дээд цол олгосон түүхтэй. Монгол Ардын Хувьсгалт Цэргийн даргалах бүрэлдэхүүнд офицерын цол олгож эхэлсэн нь ардын цэргийг орчин цагийн зэвсэгт хүчний зохион байгуулалтад нийцүүлэн өөрчлөх, цэргийн даргын манлайлал, нэр хүндийг өргөн, цэргийн хатуу чанд сахилга, дэг журмыг хэвшүүлэн тогтооход чиглэсэн нэн чухал түүхэн арга хэмжээ байв. 
Тэр цагаас эдүгээ хүртэл зэвсэгт хүчин, цагдаа, тагнуул, шүүхийн шийдвэр гүйцэтгэх, хилийн цэрэг, онцгой байдлын байгууллагуудаас 160 гаруй цэргийн дээд цолтон төрж, Үндэсний аюулгүй байдлыг хангах чиг үүргийг амжилттай гүйцэтгэж ирлээ. Өдгөө алтан мөрдөстнүүдийн маань 80 гаруй нь амьд сэрүүн ахмад үеийнхээ уламжлалыг хадгалж, эгэл цэрэг дайчидтайгаа бие, сэтгэлээрээ хамт байж, тэднийг эцэг, эхийн ёсоор халамжлан сургаж, аюулгүй орчинд үүргээ нэр төртэй биелүүлэх, өсөж хөгжих нөхцөл, боломжоор хангахын төлөө зүтгэж байна.