Өнгөрсөн амралтын өдөр буюу бямба гаригийн 19.00 цагийн орчимд 0006 УНК улсын дугаартай хар өнгийн G Class маркийн машинтай залуус МУБИС, Улаанбаатар их дэлгүүр, “Хүнсний 20”-ын автобусны буудлын ойролцоо иргэдэд их хэмжээний мөнгө тарааж, 10,000, 20,000 төгрөгийн дэвсгэрт цацсан талаар фэйсбүүк болон твиттерээр цацагдаж байв. Тэгвэл энэхүү мэдээллийг шалгасан эсэхийг ЦЕГ-ын Хэвлэл мэдээллийн ажилтан Ё.Лхагвасүрэнгээс тодруулахад “Бид шалгасан. Тийм үйл явдал болоогүй” гэсэн тайлбар өгсөн юм. 

Харин уг үйл явдлыг харсан гэрч “Би өчигдөр 19.00 цагийн орчимд Багшийн дээдийн автобусны буудал дээр зогсож байлаа. Тэнд ойролцоогоор 40 гаруй хүн байсан. Гэв гэнэт хүмүүс нэг зүйл рүү хошуурч, бөөгнөрөөд байхаар нь очиж сонирхтол 0006 УНК улсын дугаартай хар өнгийн G Class маркийн машинтай залуус 10-20 мянган төгрөгийн дэвсгэрт тарааж, хүмүүс рүү цацаж байсан. Би тэр хүмүүсийн царайг харж амжаагүй. Хүмүүс мөнгө авах гэж улайран зүтгэж, зарим нь бүр хоорондоо хэрэлдсэн. Нэлээн их мөнгө тараасан. Тэд мөнгө тараачихаад явсан. Дараа нь Улаанбаатар их дэлгүүр, “Хүнсний 20”-д мөнгө тараасан гэнэ лээ” хэмээв.

Б.Саран

Эх сурвалж: Etoim.mn