Авлигатай тэмцэх газрын даргааар ажиллаж байсан Н.Ганболдыг үүрэгт ажлаас чөлөөлөөд бүтэн сар боллоо. Уг нь, энэ сарын 04-нд Монгол Улсын Ерөнхийлөгч Авлигын эсрэг хуулийн 21 дүгээр зүйлийн 21.1 дэх хэсэгт заасан бүрэн эрхийнхээ хүрээнд Авлигатай тэмцэх газрын даргаар Цагдаагийн хурандаа Х.Энхжаргалыг томилуулахаар УИХ-д санал хүргүүлсэн ч өнөөг хүртэл асуудлыг хэлэлцээгүй байгаа билээ . УИХ-ын дэгийн тухай болон бусад холбогдох хуулиар УИХ саналыг хүлээн авснаас хойш долоо хоногт багтаан уг асуудлыг хэлэлцэх ёстой байсан ч хэлэлцэх асуудалд оруулалгүй өнөөдрийг хүрчээ.
Хэрвээ уншигчид санаж байгаа бол өнгөрсөн сарын 14-ны өдрийн УИХ-ын чуулганаар АТГ-ын дарга асан, тэргүүн комиссар Н.Ганболдыг үүрэгт ажлаас нь чөлөөлөх үед УИХ-ын гишүүд “Чөлөөлөх асуудлаа томилох хүнтэй нь хамт оруулж ирэхгүй яасан юм бэ. Хүнд албыг удирдлагагүй орхиж болохгүй. Завсар хооронд нь хууль зөрчсөн зүйл гарвал хариуцлагыг хэн хүлээх вэ. Яаралтай шинэ даргын нэрийг оруулж ир. Ч.Өнөрбаяр зөвлөх өө, одоо шууд Ерөнхийлөгчид асуудлыг хэлээд цаг алдалгүй нэрийг нь оруулаад ир” хэмээн чуулганы танхимаас шаардаж байв. Ингэж ярьж байсан УИХ-ын гишүүд маань яагаад энэ асуудлыг өнөөг хүртэл хойшлуулсаар байна вэ гэдэг нь анхаарал татах асуудлын нэг яах аргагүй мөн.
Ерөнхийлөгчийн зүгээс АТГ-ын даргаар томилуулахаар цагдаагийнхан дотроо “хатуу самар” гэж хочлогддог хурандаа Х.Энхжаргалын нэрийг санал болгосон юм. Харин уг саналыг хэлэлцэхийг хойшлуулж байгаагийн цаана Х.Энхжаргалыг дэмжихгүй байх сонирхол зарим эрх мэдэл бүхий хүмүүст байгаа бололтой. Тиймээс л АТГ-ын даргын суудал өнөөг хүртэл эзэнгүй байгаа гэх таамаглал яригдаж байна. Тус газрын даргын асуудлыг энэ долоо хоногтоо эцэслэн шийднэ гэж байсан ч бас л хойшлох төлөвтэй болсон талаар эх сурвалж мэдээлж байна.
Монгол Улсад үндэсний шударга ёсны тогтолцоог бэхжүүлэх, авлигатай тэмцэх үндэсний хөтөлбөр хэмээх баримт бичгийн төслийг Ерөнхийлөгч санаачлан УИХ-д жилийн өмнө өргөн мэдүүлснийг тухайн үед хэлэлцээд санаачлагчид нь буцаасан. Тэгэхдээ Ерөнхийлөгчийн зүгээс уг төслийг дахин боловсруулж, саяхан УИХ-д дахин өргөн мэдүүлээд байгаа юм. Тэгвэл энэхүү хөтөлбөрийн төслийг УИХ-аар хэлэлцэхтэй холбогдуулан АТГ-ын даргын томилгоог хэлэлцэхийг түрдээ хойшлуулах нь зүйтэй гэх нэрийдлээр спикер З.Энхболд Ерөнхийлөгчийн санал болгосон хүнийг хүлээн авахгүйгээр өөрийн хүнээ зүтгүүлэх болсон гэх яриа түүний ангийнхан дотроос гарсан юм. Хэрвээ хурандаа Х.Энхжаргалыг дэмжих байсан бол асуудлыг алт эрт хэлэлцэх байсан гэж ярих улстөрч олон байна.
Уг нь энэ сарын 02-ны өдөр УИХ дахь МАН-ын бүлгээс УИХ-ын даргад шаардлага хүргүүлж, АТГ-ын даргын томилгоог яаралтай шийдэхийг сануулсан юм. Уг шаардлагад “Сонгууль дөхсөн үед хууль хүчний байгууллагууд бүрэн бүрэлдэхүүнээрээ ажиллах ёстой. Улс төрөөс ангид хуулийн хэрэгжилтийг хангаж ажиллах ёстой” гэдэг үндэслэлийг гаргаж тавьсан байв. Тиймээс УИХ-ын гишүүдийн хэлсэнчлэн хүнд албыг удирдлагагүй орхиж болохгүй. Завсар хооронд нь хууль зөрчсөн зүйл гарвал хариуцлагыг хэн хүлээх вэ гэдэг асуудал гарч ирж байна. Тэгэхээр УИХ-ын дарга З.Энхболд өөрийн ч бай ч өрөөлийн ч бай хүнийг яаралтай томилохгүй бол “Чоно борооноор гэгчээр” ар хударгаар чинь олон хууль бус үйлдэл давтагдах вий гэх болгоомжлол нийгэмд хэдийнэ бий болчихоод байна.

Эх сурвалж: