Монгол улсын арслан цолд хүндэтгэл үзүүлэх уламжлалт барилдаан яг одоо Монгол бөхийн өргөөнөө өндөрлөж байна. Энэхүү барилдааныг МҮБХ үндэсний манлай үйлдвэр Арвайн үндэс ХХК хамтран зохион байгуулсан агаад хүндэтгэлийн барилдаандаа улсын арслан Ц.Бадамсэрээжид, У.Мижиддорж, Л.Сосорбарам, Ө.Эрдэнэ-Очир, Ж.Хайдав, М.Мөнгөн-Оньс, Б.Ганбаатар, Д.Мөнх-Эрдэнэ, Б.Ганбат, Н.Батсуурь нарын үе үеийн арслан цолтнууд хүрэлцэн ирж, хүндэтгэлийн хоймроос барилдаанаа үзэж сонирхов. Харин залуу арслан П.Бүрэнтөгс, Э.Оюунболд нар зодогложээ.
Арвайн үндэс компаний хамт олон болон нутаг нугынхан, ах дүү хамаатан садан, найз нөхдөөс нь арслан цолтнууддаа хүндэтгэл үзүүлж баяр хүргэлээ.
Барилдаанд улсын аварга С.Мөнхбат, улсын арслан П.Бүрэнтөгс, Э.Оюунболд, гарьд И.Доржсамбуу, заан Б.Соронзонболд, харцага Ө.Бат-Орших, Д.Батболд, Б.Пүрэвсайхан, Н.Батзаяа, Ө.Даваабаатар, А.Бямбажав, Г.Алтангэрэл, Ж.Амартүвшин, начин Э.Энхбат, И.Ёндонсамбуу тэргүүтэй у.ав 1, у.а -2, у.г -1, у.з 1, у.х 8, у.н 15, а.ц.а 52, а.ц.з 24, а.ц.х 24, а.ц.н 65, с.з, з.б 31 нийт 224 бөх зодоглов.
Хоёр залуу арслан цолныхоо хүндэтгэл түрүү булаалдаж, Бүрэнтөгс давхар шуудагнаас түрж хөөхдөө өөрөө чирэгдэн шороодсоноор Оюунболд арслан түрүү бөхөөр тодров. Их шөвөгт харцага Ө.Бат-Орших, а.а О.Хангай нар шалгарсан билээ. Их шөвөгт Бүрэнтөгс арслан О.Хангайг амлаж, Оюунболд Бат-Орших нарыг тунаав. Оюунболд барьц сонгон мордож Бат-Оршихыг давлаа.
Хангай өмнөх даваанд нь Пүрэвсайхантай тунаж, ёстой л хүчийг шавхан барилсан бөгөөд Пүрэвсайханы хөлд орж тэр чигт нь хөөж давснаар ийнхүү их шөвөгт шалгарсан юм. Харин Бат-Орших харцага Эрдэнэхүү хурцыг ганган хавирсан даа.
Баянхонгор аймгийн арслан Б.Бат-Амгалан тавын даваанд аварга С.Мөнхбатыг хавирч даван шуугиулсан ч дараагийн даваанд Э.Оюунболд арслантай барилдах үеэрээ эмчийн магадлагаагаар барилдааныг орхисон нь харамсалтай.
Үзэгчдийн хүсэлтээр у.а Л.Сосорбарам, Б.Ганбаатар, Д.Мөнх-Эрдэнэ, П.Бүрэнтөгс, Н.Батсуурь, Э.Оюунболд нарын арслангууд өргөөнд цугласан олонд боорцог тараасан нь бас нэг сонин байв. Үзэгчид ч тэр, тараасан бөхчүүд ч тэр хэн хэн нь сэтгэл өндөр байлаа.
Undesniibukh.mn
