Энэ тухай  МАХН-ын дарга, Монгол Улсын гурав дахь Ерөнхийлөгч Н.Энхбаяр:

 

"-Монголд тогтсон шударга бус луйварчдын дэглэмийн эсрэг тэмцлийн аргыг сонгож, өлсгөлөн зарлахаар шийдсэн.Би санаачилсан. Намын нэр дээр сонгуульд нэр дэвших хүмүүс сайн дураараа нэгдэж байна. Мөн эмэгтэйчүүдээ өлсгөлөн зарлах хэрэггүй гэж үзсэн. Эх хүн, ээж хүнийг зовоож болохгүй гэсэн байр суурьтай байна. Би долоон жилийн турш ямар нэгэн төр засгийн ажил, алба хашсангүй. Хашъя ч гэж бодсонгүй. Хэлмэгдлээ, хүчээр хилс хэрэгт ял тулгуулж шоронд орж үзлээ. “Өнөөдрийн энэ дэглэм нэг л биш. Төрийн тэргүүн байсан хүнээ ямар ч үндэслэлгүйгээр шоронд хийчихээд өөрсдөө ичих ч үгүй явдаг” гэж ард түмэн уулзахдаа хэлж байна. Тэр ч яахав. Эр хүн туг ч барина. Тугал ч хариулна гэдэг учраас эмзэглэсэн юм байхгүй. Дараа нь зарим хүмүүсийн тарьсан балгаар эрүүл мэндээрээ хохирч гадаад руу удаан хугацаагаар эмчлүүлэхээр явлаа.

 

Энэ бүх хугацааг эргээд харахад луйврын сонгууль цэцэглэж, булхай, хээл хахууль тэнгэрт хадлаа. Ард түмний ядуурал урьд өмнө байгаагүйгээр нэмэгдлээ. Хамгийн гол нь төр засагт итгэх ард түмний итгэл урьд өмнө байгаагүй тийм дор очлоо. Залууст ямар ч ажлын байр, ирээдүй харагдахгүй байгаа учраас олноороо гадаад руу явж ажиллаж байна. Эх орноосоо явах гэж зүтгэж байна. Гадаадад эмчлүүлж байхдаа хааяа монголчуудтай тааралдахаар “Сүүлийн үед монгол хүмүүс маш их ирж байна. Эдийн засаг хүндэрч, ажлын байргүй болоод ирлээ гэж хэлж байна. Та харин Монголдоо хурдан очиж энэ бүх байдлыг илчилж, бидний төлөө тэмцээч ээ.

 

Монгол Улсын Ерөнхийлөгч, Ерөнхий сайд байсан хүн учраас бидэнд өртэй” гэж шаардсан. Ард түмний шаардлагаар хүрч ирээд харахад үнэхээр балмад төр тогтсон байна. 2012 онд намайг мэдлэг боловсрол дутуу гээд сонгуульд оролцуулахгүй хассан. Хууль хяналтын байгууллагаар ямар ч үнэн тогтоогдоод Ц.Элбэгдоржийн гарт энэ салбар орсон учраас зөвхөн элбэгдоржтонгуудад л үйлчилдэг. Энэ явдал 2016 онд давтагдах гэж байна. Н.Энхбаярт хууль бусаар тулгасан ялаа өршөөсөн нэр зүүчихээд сонгуулиас хасна гэж оролдож байна. Ялтай юу, үгүй юу гэдэг асуудлаар судлаад шударгаар дүгнэлт гаргаад өгөөч гэж Хүний эрхийн үндэсний хороонд хандсан. Энэ байгууллага “Тал талаас нь судалсан. Та ялгүй. Ямар ч албан тушаал хашиж болно” гэсэн дүгнэлт гаргасан. Ийм дүгнэлт гарсан учраас би сонгуульд нэр дэвшиж, намынхан намайг дэвшүүлж байгаа. Хэрэв ард түмэн намайг дэмжих юм бол тэднийхээ төлөө зүтгэнэ гэж бодсон. Намынхан маань ч хүссэн. Гэтэл намайг дэвшүүлэхгүйн тулд огт үндэслэлгүй, хууль бус аргаар сонгуульд оролцуулахгүйн тулд Ц.Элбэгдорж, Ч.Сайханбилэг, Р.Чингис  нарын луйвардаж гарч ирсэн, Тавантолгойн нууц олигархиудыг хамгаалж байгаа  балмад нөхдүүд бусармаг үйл ажиллагаа явуулж байгаа учраас эсэргүүцэж байна. Ард түмэндээ ойлгуулах гэж арга ядсандаа  өлсгөлөн зарлалаа. Бидэнд буу, албан тушаал, эрх мэдэл байхгүй. Харин ард түмэн байна. Ард түмний дэмжлэг албан тушаалаас илүү хүчтэй. Энэ дэмжлэг бидэнд байна, олигархиудад алга.

 

Луйврын сонгуулиар төрд шургалсан эрх мэдэлтнүүдийн хэдхэн гэр бүлийг тэжээж, тэдэнд дарлуулж, доромжлуулж, айж эмээж, амьдарсан доройтсон долоон жилийг ардаа үлдээе. Хамтдаа өөр­чилье. Сонгуульд оролцож Сонгуулийн хувьсгал хийе гэж бид зорьсон. Гэвч биднээс айгаад сонгуульд оролцуулахгүйн тулд хууль бус арга ашиглаж байна. Сонгуульд ороод багаа ажиллуулъя гэвэл маш сайн боловсон хүчин бий. Хуульч, эдийн засагч, Нобелийн шагналыг багаараа авсан хурандаа, буяны ажил байнга хийж, ард түмэнтэйгээ холбоотой байдаг залуус, УИХ-ын гишүүнээр ажиллаж байсан туршлагатай, урлагийн салбарт тод мөрөө үлдээсэн хүмүүс байна. Хуульзүйн дэд сайд байсан Э.Эрдэнэжамъяныг сонгуульд оролцуулахгүй гэсэн.

 

Мөн УИХ-ын гишүүн О.Баасанхүүг хүмүүсээр зориуд худал нэхэмжлэл гаргуулж хасахыг оролдож байна. Сонгуульд оролцсон ч гэсэн хууль, шүүхийн хаалга татаж явсаар сонгогчидтой уулзахгүй байх байдлыг бий болгож дарамталж байна. Энэ мэтээр манай багийг хасахаар улайран зүтгэж байна. Юунаас айгаад байгаа юм. Н.Энхбаярын баг гараад Монголыг хөгжүүлчихнэ, өнөөдрийн энэ нөхдүүд монголоор тоглож байжээ гэдгийг харуулчихна, булхай нь илэрчихнэ гэж айж байна. АН-ын нэрийг ашигласан Ц.Элбэгдорж, Ч.Сайханбилэг гэсэн үл бүтэх бүлэг этгээд байна. Тэд хамаг өрөм тосыг нь идчихээд ардчиллын нэрийг эргээд гутаагаад байна. МАН ч адилхан. Наанаа дуугүй царайлаад байгаа мөртлөө бусармаг бүхнийг дэмжиж байна.

 

Гэхдээ МАН-ын жирийн гишүүд биш удирдлагад нь шигдэж Ц.Элбэгдоржийн гар хөл болсон, хуйвалдааны дагуу Засгийн газарт орж ажиллаж МАНАН-г байгуулсан цөөн тооны хүмүүс намаараа тоглож дуусч  байна. Ард түмэн дургүйцлээ илэрхийлээд байгаа нь энэ хоёр намын удирдлагыг больё гэж байна. С.Баяр гэдэг луйварчин МАН-ын сонгуулийн төв штабыг толгойлж байгаа. Дахиад МАНАН-г тогтоох гэж байна. Энэ  бүхний эсрэг бид тэмцэж байгаа. Ард түмэн Н.Энхбаяр, Э.Эрдэнэжамъян, О.Баасанхүү, МАХН-ын багийг сонгох гээд байгаа учраас сонгуульд оролцуулахгүйн тулд ажиллаж байна. Бид үүнийг зогсооно. Шударга сонгууль хийтэл нь тэмцэнэ.

 

АСЕМ болно  гэж байшингаа будаж, замаа засч байгаа нь зөв. Гэхдээ үүний цаана юу байгаа, АСЕМ-д зарцуулж байгаа мөнгөний тал нь луйварчдын хармаанд орж байна.  Тэр мөнгө эргээд сонгуулийн мөнгө болж ард түмнийг худалдаж авах гэж байна. Энэ бүхний эсрэг өөрсдийнхөө эрүүл мэнд, амь насаар дэнчин тавьж тэмцэж байна. Миний амь нас монголын ард түмний эрх ашиг, ирээдүйн гэрэл гэгээтэй байдлын дэргэд юу ч биш.

 

Өлсгөлөнгийн эхний үе шат зургадугаар сарын 5 хүртэл үргэлжилнэ. Луйварчдын гар хөл СЕХ-нд шигдсэн эсэх нь тэр үед тодорхой болно. Эцсийн эцэст хэнийг сонгохоо ард түмэн л мэднэ. Ц.Элбэгдорж мэдэхгүй. Хамгийн түрүүлж улс төрөөс гарах ёстой хүн бол Ц.Элбэгдорж гэдгийг тууштай хэлсэн дээр гэж бодож байна. Луйварчид байгаа цагт би сонгуульд орж чадахгүй ч байж магадгүй. Гэхдээ ард түмэндээ хандаад биднийг дэвшүүлж байгаа мөрийн хөтөлбөрийг сайн уншиж дүгнээд манай багийг л  сонгочих гэж хэлмээр байна." гэв.