Өнгөрсөн сард сүйрсэн Египетийн агаарын тээврийн компанийн нисэх онгоцны хар хайрцгуудын нэгнээс ирсэн дохиоллыг бүртгэж авлаа гэж Францын эрлийн багийнхан мэдэгдэв.

Газар Дундын тэнгист эрэн хайх ажиллагаа явуулж байх үеэр Францын "Laplace” хөлөг онгоцонд дохио ирсэн байна.

Египетийн агаарын тээврийн компанийн "Airbus A320” өнгөрсөн сарын 19-нд Парисаас Каирын чиглэлд нисч яваад осолдон сүйрсэн бөгөөд уг онгоцонд нийт 66 хүн байжээ.

"Нисэх онгоцны хар хайрцгаас дохио ирснээр эрлийн ажиллагаа явуулах гол цэгийг тодорхойлж чадлаа” гэж Францын Мөрдөн шалгалт, дүн шинжилгээний товчооны ажилтан Реми Жоути ярилаа.

"Laplace” хөлөг онгоц нь хар хайрцагнаас гаргаж буй "байрлал тодорхойлогч дуу авиаг” илрүүлэх төхөөрөмжөөр тоноглогдсон юм. Түүнчлэн 3000 м-ийн гүнд шумбах чадвартай робот бүхий хөлөг онгоцууд ирэх долоо хоног гэхэд эрлийн газарт очиж, хар хайрцгийг олоход туслах ажээ.

Д.Нямтулга