МАХН-ын дарга Н.Энхбаярыг нэр дэвшүүлэхгүй байх том эрх ашиг  МАНАН-д, дээр нь Ерөнхийлөгч Ц.Элбэгдоржид, Монголын уул уурхай руу онилсон гадныханд байна.  

 

Хууль хяналтынхан тэдний  захиалгыг  биелүүлдэг гэсэн хардлага байдаг нь ч  ор үндэсгүй биш ажээ. Нийслэлийн өмчид одоо ч байгаа “Улаанбаатар сонин”-ы газар, “Өргөө” зочид буудлын хувьчлал зэрэг үлгэр үүнийг сануулна. 2012 оны сонгуульд нэр дэвшихэд нь  мэдлэг чадвар чинь хүрэхгүй гэсэн СЕХ-ны  хачиртай  хариу, 500 цагдаагаар хүч нэмэгдүүлсэн баривчилгаа, түүнээс үүдсэн хуурай өлсгөлөн  хамгийн тод илрэл нь. Тэгвэл тэр явдал одоо ч  дуусаагүйг баталсан, илэрхийлсэн үйл явдлууд дахиад үргэлжлэв.

 

Тухайлбал, 2016 оны сонгуулийг  угтуулан хоёр том намынхан  Н.Энхбаярын   “ялтай  хугацаа” дуусаагүй гэх шалтаг гаргаж ирэв. Тэр нь далд  утгаараа  СЕХ –нд өгсөн чиглэл, ил харагдах нь нэр дэвшүүлэхгүй байх  үндэслэл аж.  Үндсэн хуулиар олгогдсон сонгох, сонгогдохоос эхлэн эрх, эрх чөлөөгөө хумиулахад хүрсэн экс Ерөнхийлөгч энэ удаа дахин  тэмцлийн хурцхан хэлбэрийг сонгосон нь нойтон өлсгөлөн байлаа. Энэ асуудал сонгуулийг ажиглахаар ирсэн  олон улсын шинжээч ажиглагчдын анхаарлыг татав.   ХЭҮК  ч асуудлыг судалж  үзжээ. Үүний эцэст Н.Энхбаярт холбогдуулах  “ялтай хугацаа” гэж юм байхгүй,  тэр бүү хэл мөрдөн байцаалтын шатанд түүний асуудал эцэслэгдэх байсныг  дүгнэлтээр гаргасан байна.

 

Ийм даваануудыг туулан байж  МАХН-ынхан нэр дэвшигчдийнхээ материалыг  СЕХ-нд хүлээлгэж өгөөд байна.  Өлсгөлөнгөө  ч зогсоосон. Зогсоох ч гэж үүнийг гишүүд, дэмжигчид нь  түр зогсолт,  амсхийлт  гэж тайлбарлаж буй. Н.Энхбаяр хэлэхдээ “Өнөөдөр бид олигархиудтай  Тавантолгойг хуваагаад авчихсан бол ийм байдалд байхгүй байсан. Оюутолгойн олигггүй гэрээг нь сайн болсон гээд явсан бол дарамт шахалтад өртөхгүй байсан” гэсэн. Тэр бүхний эсрэг цохилтод өнөөдрийг хүртэл өртөж яваа нь ч  үнэн.  

 

Улс төрийн тавцан дээр ийнхүү  байнга шахам буланд  шахагдаж, хавчигдаж яваа  учраас  цаашдаа ч  өлсөх, жагсах, тэмцэхэд бэлэн байхаас аргагүй. Ийм үндэслэл ч байна. Учир юу гэвэл, Цэцийн дээр цэлмэг тэнгэр л байна гэчихээд МАНАН зайдалчихсан шиг,  СЕХ-ны дээр сонгогчдын эрх ашиг байна уу, сонирхлын зөрчил эргэлдэж байна уу гэдэг нь одоогоор таашгүй, бүрхэг юм.  Тэгээд ч СЕХ-ны дарга, ажилтнууд  “Бид нэр дэвшигч, намуудын материалыг  л хүлээж авч байгаа. Бүртгэх тухай асуудал энд яригдахгүй.

 

Материалыг аваад тус бүрд нь  нягталж үзсэний дараа СЕХ-ны хуралдаанд оруулж, тэндээс шийдвэр гарч байж бүртгэх тухай асуудал шийдэгдэнэ”  хэмээн  хэлж байв. Хэнийг бүртгэх, хэнийг бүртгэхгүй байх, аль намыг бүртгэх, алийг нь буцаахыг хөшигний цаана  хэн нэг МАНАН-гийн зааварлагч заасан ч юм уу, хэн мэдлээ.