УИХ-ын сонгуулийн 59-р тойрогт (Сүхбаатар дүүргийн 1-6-р хороо, Багануур дүүргийн 2, 4-р хороо) “Хяналттай төсөв, Хариуцлагатай улс төр, Соёлтой нийгмийн төлөө” гэсэн уриатайгаар бие даан нэр дэвшигч Баатаржавын Мөнхсоёл өнөөдөр сонгуулийн сурталчилгааны нээлтээ албан ёсоор хийлээ. Тэрээр энэ удаагийн сонгуульд мэдлэгтэй, боловсролтой, туршлагатай эмэгтэйчүүдийн төлөөлөл болон оролцож байгаагаас гадна улс төрийн нам, бүлэглэлүүдэд “барьцаалагдаагүй” бие даан орж ирж байгаагаараа онцлогтой. Тойргийнхоо нэр дэвшигчдийн “ганц” бие даагч энэ эмэгтэй Иргэний нийгмийн байгууллагад олон жил ажилласан, эдийн засгийн асуудал, судалгаа, төсвийн бодлогоор мэргэшсэн, гадаадын их дээд сургуульд мэргэжил дээшлүүлсэн, өндөр мэдлэг боловсролтой гэдгээрээ хүчтэй өрсөлдөгчдийн нэг болон орж ирж байна. Тэрээр мөрийн хөтөлбөрөө 5 чухал,  9 эрхэм зүйлээр тодорхойлсон бөгөөд “Яагаад бие даагчийг сонгох сонгох ёстой вэ?” гэсэн асуултад “Бие даагч бол иргэн таны төр барилцах шууд оролцоо мөн. Хариуцлагатай, ёс зүйтэй, буцах эзэнтэй зөв шийдэл.  Эдийн засгаа эрүүлжүүлэх зөв гарц, эрүүл мэнд, бололвсролын салбараа эзэнгүй орхин гадаадыг зорин алга болдог сэтгэлгүй засаглал биш. Байгалийн баялгаа хяналтгүй олборлож, ирээдүй хойч үеэсээ идэх хоолыг нь булаадаг эрээ цээргүй шунахайрал биш, талцал хуваагдал, сандал суудлын өрсөлдөөнгүй зөв төр гэж би хариулж байна. Хамгийн гол нь муу хүмүүсийг явуулъя гэвэл та заавал сонгуулиа өгөх хэрэгтэй шүү” хэмээсэн юм. 59-р тойрогт СБД-ийн 1-6 хорооноос гадна Багануур дүүргийн 2,4-р хороо орж байгаа учраас бие даагч мөн Багануур дүүрэгт албан ёсны нээлтээ үргэлжлүүлэн хийх юм байна.

Эх сурвалж: УИХ-ын сонгуулийн 59-р тойрогт бие даан нэр дэвшигч Б.Мөнхсоёлын төв штаб