2016 оны 6 дугаар сарын 26                                                   Улаанбаатар хот

2016 оны 6 дугаар сарын 26-ны өдөр УИХ-ын сонгуулийн 57-р тойрогт Ардчилсан намаас нэр дэвшигч Л.Болдын штабаас Хан-Уул дүүргийн Цагдаагийн 2-р хэлтэст гаргасан хүсэлтдээ иргэн С.Мөнхзаяа, түүний нөхөр Б.Батмандал нарыг сураггүй алга болсон, гар утас нь /бичлэг/ алдагдсан, амь насанд нь аюул занал учруулсан хэрэгт нэр дэвшигч Т.Доржхандын штабыг холбон, энэхүү мэдээллээ news.mn болон бусад хэвлэл мэдээллийн хэрэгслээр дамжуулан тараалаа.

Гэтэл Хан-Уул дүүргийн Цагдаагийн 2-р хэлтсээс бидний авсан мэдээллээр өнөөдөр буюу 2016 оны 6 дугаар сарын 26-ны өдрийн 14:30 цагт иргэн С.Мөнхзаяа, түүний нөхөр Б.Батмандал нар нь мөрдөн байцаагч, ахмад н.Ерболд холбогдох тайлбар, мэдүүлгээ өгсөн ба иргэн С.Мөнхзаяа, Б.Батмандал нар нь С1 телевизийн 19 цагийн мэдээгээр ямар нэг дарамт халдлагад өртөөгүй, эрүүл саруул байгаагаа мэдэгджээ.

Монгол улсын Эрүүгийн хуульд заасан бусдын эд хөрөнгийг хууль бусаар авах, бусдын эрүүл мэнд, амь насанд нь халдах гэмт хэргийн шинжтэй үйлдэлд нотлох баримтгүйгээр биднийг гүтгэсэн, энэ тухайгаа хэвлэл мэдээллийн хэрэгслээр олон нийтэд тараасан нь нэр дэвшигч Т.Доржхандын алдар нэр, ажил хэргийн нэр хүндэд ноцтой хохирол учруулсан төдийгүй сонгуулийн сурталчилгааны явцад бусдыг гүтгэж, хуурамч мэдээ мэдээллийг төрөл бүрийн хэлбэрээр тараасан байх тул манай штабаас учруулсан гэм хорыг иргэний шүүхэд нэхэмжлэх, гэмт хэрэгт гүтгэсэн үйлдлийг нь шалгуулахаар Цагдаагийн байгууллагад гомдол гаргах болсноо албан ёсоор мэдэгдэж байна.

Л.Болдын сонгуулийн штабаас хэвлэл мэдээллийн хэрэгслээр үндэслэлгүй, худал мэдээллийг зориудаар, тодорхой зорилготойгоор тараасан хариуцлагагүй хууль бус үйлдэл хийсэнд харамсаж байна.

Нийт ард иргэд, сонгогчиддоо нэр дэвшигч Т.Доржхандын сонгуулийн штаб хуулийн дагуу ёс зүйтэй ажиллаж байгаагаа мэдэгдэхийн зэрэгцээ сонгогч бүр хэн нэгний ятгалаг, хий хоосон амлалт, увайгүй гүтгэлэг, цуурхалд авталгүй сонгох эрхээ чөлөөтэй эдлэхийг уриалж байна.