УИХ-ын ээлжит сонгууль болдгоороо болж өнгөрнө. Харин маргаашнаас нь эхлэн амьдрал хэвийн үргэлжилдгээрээ үргэлжилнэ. Гэтэл энэ удаагийн сонгууль амь амьдрал, ажил үйлс нь болчихсон юм шиг бүх зүйлээ зориулчихсан бас улайрчихсан хүмүүс байна. Тэдний нэг хэсэг нь манай жүдочид юмуудаа гэж харж хардаж суугаа юм.
Уг нь наймдугаар сард “Рио-2016” олимп болно. Гэвч жүдочид бэлтгэлээ хийж байгаа нэрийдлээр бүхнээ цалгардуулж, Женко Х.Баттулга, Олимпийн аварга Н.Түвшинбаяр хоёрын царцаанууд болж Баянхонгор аймагт сонгуулийн сурталчилгаанд оролцож яваа зураг нь сошиал ертөнцөд тархаж шүүмжлэл дагуулаад эхлэв. Тэдэнд УИХ-ын сонгууль хэрэгтэй юмуу, эсвэл олимпид амжилт гаргах нь хэрэгтэй юү гэдгээ хаана хаанаа тунгаан бодмоор юм даа. Хэдий багш нь байгаад тамирчдадаа санхүү болон бусад зүйлсээр тусалдаг ч ийм үед ингэж улстөржиж сонгуулийн сурталчилгаанд оролцож туйлшрах нь хэрэг байна уу даа. Залуу хүмүүсийн хувьд зорилгынхоо төлөө тууштай явах ёстой баймаар.
Жүдочидоо Х.Баттулгын багшийнхаа удирдлага дор бэлтгэл сургуулилалтаа хийж байгаа ч, олимпийн аваргаа дэмжиж байгаа ч олимпийн бэлтгэлээ битгий цалгардуулаачээ, амжилт гаргахаа бодоочээ. Тэд бэлтгэл хийгээд л нэр дэвшигчийг иргэдтэй уулзах үеэр нь очиж сонгогчдод мэхийн ёслон, дэмжихийг уриалан “Хамтын хүч Амжилт” гээд хаа байсан Баянхонгор аймагт манай жүдочид “хатирч” явна.
Олимпийн аварга Н.Түвшинбаяр Баянхонгор аймгаас Женко Х.Баттулгын хатгаасаар УИХ-ын сонгуульд нэр дэвшиж байгаа бөгөөд тэрбээр олимпийн бэлтгэлээ ч орхигдуулсан байгаа нь үнэн юм. Учир нь улс төржөөд. Уг нь энэ жил түүний хувьд отгон олимп бөгөөд хүндлэн хайрладаг ард түмэн тань аваргаа дахин амжилт гаргахыг хүлээж суугаа. Гэтэл улстөр хэмээх бохир ертөнц рүү орсон тэрбээр олимпоо хойш тавьж, сонгуульд ялалт байгуулж суудал олохын төлөө хүчин зүтгэж буй.
Гэхдээ өөрөө л зүтгэх мөрөөрөө зүтгэнэ биз дээ, бусдыгаа битгий уруу татаж, бэлтгэлийг нь цалгардуулаач ээ аваргаа. Та уг нь багаа дасгалжуулж, төлөөлж авч явах ёстой хүн. Гэтэл багшийнхаа сонгуулийн пиарт ашиглаад явж байх юм. Нөгөөдүүл нь ч залуу хүмүүс байна спортын амжилт гаргахын төлөө хичээх ёстой байтал завхарсан улстөрд сонгуулийн сурталчилгаанд оролцсон “тууж” явах жишээтэй. Женко Х.Баттулга, аварга Н.Түвшинбаяр хоёрын царцаанууд болж явснаас олимпдоо шаргуу бэлтгэ. Учир нь цөөхөн хоног үлдсэн байна шүү.
О.Сайхан
