Коронавирусээр өвчилсөн Франц иргэн  Монголд ирснийхээ дараа Улаанбаатарт 40 гаруй хүнтэй, хөдөө орон нутагт 80 орчим хүнтэй уулзсаны нэг нь    Сайншанд нарны цахилгаан станцын ажилтан У. Энэ эмэгтэй Коронавирусээр өвчилсөн Франц иргэнтэй   Улаанбаатар хотоос Сайншанд хүртэлх 253-р галт тэргэнд хамт  зорчиж, хөл хорионд орсон байжээ.

Гэтэл энэ хүнтэй  “Сэргээгдэх эрчим хүчний үндэсний төв” ТӨААТҮГ-ын захирал Ц.Цэрэн гуравдугаар сарын 10-ны өдөр Сайншандын Сурговь зочид буудалд албан ажлаар Улаанбаатар хотоос зорьж очин уулзжээ. Уулзахдаа зүгээр ч нэг уулзсангүй. Хонон өнжин архидаж зугаацжээ.  Хачирхалтай нь сэргээгдэх эрчим хүчний захирал хотоос эхнэр, 2  хүүхдээ дагуулан явсан бөгөөд  энэ  томилолтонд  975,000 төгрөгийг Сэргээгдэх эрчим хүчний үндэсний төвөөс гаргуулан  зарцуулжээ.

Нэгдүгээр хавьталд орсон иргэдийг гуравдугаар сарын 10-ны өдөр Сурговь зочид буудалд хөл хорионд оруулж, тусгаарласан боловч  “Сэргээгдэх эрчим хүчний үндэсний төв” ТӨААТҮГ-ын захирал Ц.Цэрэн нь албан тушаалаараа далайлгаж, хөл хорионд орохгүй хэмээн Улсын онцгой комиссын ажилчдад хүндрэл учруулан дөвчигнөсөн гэх мэдээлэл ч байна. 

Үүгээр ч зогсохгүй 14 хоногийн хөл хорионд  орсон тэрээр гуравдугаар сарын 13-ны өдрийн оройн 21.00 цагийн орчимд Налайхын постоор нэвтэрч Улаанбаатар хотод  эхнэр Ч болон охин Н, хүү А нарын хамтаар Nissan patrol загварын УНА 61-89 улсын дугаартай тээврийн хэрэгслийг хөлөглөн орж ирсэн байна.

Монгол Улсын Засгийн газраас өндөржүүлсэн бэлэн байдал зарлан хөл хорио тогтоож, олон тэрбум төгрөг зарцуулан  хүн амаа цар тахалаас сэргийлэхийг хичээж байгаа боловч энэ бүхэн   ямар ч  үр дүнгүй талаар болоход ойрхон байна.

Солонгос улсыг нэг л зөрүүд эмгэн” балласан” . Харин энэ удаад Монголыг эрх мэдэлтэй, цар тахлыг басамжилсан энэ мэт хурган дарга  нар “сүйрүүлэхэд” ойрхон байна.

Хөл хориог энгийн иргэн зөрчсөн бол хатуу хариуцлага тооцож бүр тав хүртэлх жилийн хорих ялаар шийтгэнэ гээд хуульд тусгачихсан байгаа. Харин энэ даргад ямар хариуцлага тооцох бол гэдэг нь сонин байна.

Ц.Цэрэнгийн тухайд УИХ-ын тамгын  газрын ерөнхий нарийн бичгийн дарга асан Ц.Цолмонгийн төрсөн ах юм байна. 2016 оны сонгуулийн дараа төрсөн дүү Ц.Цолмон нь УИХ-ын дарга М.Энхболдод нөлөөлснөөр Ц.Цэрэнг “Сэргээгдэх эрчим хүчний үндэсний төв” ТӨААТҮГ-ын захирлын албан тушаалд томилуулсан гэх.

Ямартай ч аюулт өвчний халдвараас сэргийлэхийн тулд улс даяараа эрвийх дэрвийхээрээ хичээж байгаа энэ цаг дор шахаагаар томилогдсон Ц.Цэрэн мэтийн хурган дарга нар хуулийг уландаа гишгэчин сагсалзаж байна. Хэрвээ Ц.Цэрэн короновирусын халдвар тээсэн байгаад аялаж, зугаалах замдаа олон зуун хүнд халдвар тараасан байвал хариуцлагыг хэн хүлээж, хохирлыг хэн барагдуулах вэ, Ерөнхий сайд У.Хүрэлсүх ээ!

Т.Хэрлэн 

Эх сурвалж: Zuv.mn