
АҮЭБ-ийн дэд сайд Б.Мөнхтамир шатахууны нөөц, нийлүүлэлт болон шатахууны үнийн талаар мэдээлэл өглөө.
Тэрбээр шатахууны нөөц бүрдүүлэх савны бүтээн байгуулалт үргэлжилж байгаа бөгөөд 2028 он гэхэд Монгол Улс 3-4 сарын хэрэглээтэй тэнцэх хэмжээний шатахуун нөөцлөх савтай болно гэв. Тодруулбал, 2024 онд Засгийн газрын татаастай зээлийн хүрээнд аж ахуйн нэгжүүд шатахуун хадгалах сав барьж эхэлсэн бөгөөд одоогоор зарим нь ашиглалтад орж эхэлжээ. Ирэх оны хавар гэхэд бүх сав ашиглалтад орох төлөвтэй байгаа аж. Ингэснээр 2028 он гэхэд 300 гаруй мянган метр куб шатахуун нөөцлөх багтаамж бүрдэх юм байна.
Мөн энгийн АИ-92 шатахууны хэрэглээнээс урт хугацаандаа татгалзах шаардлагатай гэж үзэж байгаагаа илэрхийллээ. Түүний хэлснээр энгийн АИ-92 шатахууны хүхрийн агууламж 400 ppm байдаг бөгөөд Улаанбаатар хотод хэрэглэхийг хязгаарласан зохицуулалт үйлчилдэг байна. Учир нь хүхрийн агууламж өндөртэй шатахуун нь хүний эрүүл мэндэд сөрөг нөлөөтэйгээс гадна нийслэлийн агаарын бохирдолд нөлөөлдөг аж.
Гэхдээ энгийн АИ-92 шатахууныг хэрэглээнээс шууд халах боломжгүй тул Евро-5 стандартын шатахууны үнийг бууруулах боломжийг судалж байгаа талаар хэлэв. Түүнчлэн К5 төрлийн шатахууны үнийн асуудлаар холбогдох арга хэмжээний талаар ярилцсан ч одоогоор эцсийн шийдвэр гараагүй байна. Цаашид шатахуун импортлогч аж ахуйн нэгжүүдтэй уулзаж, үйл ажиллагааны зардал болон эргэлтийн хөрөнгийн боломжийг нь харгалзан шатахууны үнийг бууруулах, нөөц бүрдүүлэхэд дэмжлэг үзүүлэх асуудлыг хэлэлцэхээр төлөвлөжээ.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!