"Эрэл” компанийн ТУЗ-ийн дарга Б.Эрдэнэбат, түүний эхнэр бөгөөд компанийн хувьцаа эзэмшигч Д.Сэргэлэн нарт холбогдох эрүүгийн хэргийн шүүх хурал хоёр дахь өдрөө үргэлжилж байна. Тэднийг “Номин холдинг”-ийн удирдах зөвлөлийн дарга Ш.Баярсайханаас 20 тэрбум төгрөгийг залилсан гэх үндэслэлээр шүүж байгаа аж.

Эрүүгийн хуулийн 17.3-2.2-т холбогдох тус хэрэг Хан-Уул дүүргийн эрүүгийн хэргийн анхан шатны шүүхэд зургаадугаар сарын 2-нд ирж шүүх хүлээж авсан. Долоодугаар сарын 10-ны урьдчилсан хэлэлцүүлгээр яллагдагч нарыг шүүхэд шилжүүлсэн бөгөөд гэм буруугийн шүүх хуралдааныг долоодугаар сарын 24-нд товлосон. 

Гэвч Б.Эрдэнэбат, Д.Сэргэлэн нар нэмж өмгөөлөгч авах ба өмгөөлөгчид хэргийн материалтай танилцана гэсэн үндэслэлээр гэм буруугийн шүүх хуралдааныг хойшлуулаад байв. Ийнхүү өчигдөр буюу наймдугаар сарын 5-ны өдөр гэм бурууг шийдвэрлэх шүүх хуралдаан эхэлсэн бөгөөд нотлох баримт шинэчлэн судлах шатандаа үргэлжилж байна.

Нотлох баримт шинэчлэн судлах гэдэг нь шүүх хуралдааны явцад улсын яллагчийн талаас хэргийг нотлох, өмгөөлөгчийн талаас хэргийг цагаатгах, хөнгөрүүлэх ямар нөхцөл боломж байгааг судалж нотлох баримтуудыг хэлэлцэх үе шат юм.

Энэ талаар Хан-Уул дүүргийн эрүүгийн хэргийн анхан шатны шүүхийн олон нийттэй харилцах мэргэжилтэн Ж.Оюунцэцэг “Шүүх хуралд хохирогч тал хоёр, шүүгдэгч тал гурван өмгөөлөгчтэй оролцож байгаа ба яллах дүгнэлтээр “Номин холдинг” компанийн тэргүүн Ш.Баярсайханаас 20 тэрбум төгрөгийг залилсан гэсэн эрүүгийн хэрэг үүсэж ирсэн” гэв.

Гэм буруугийн шүүх хурлаар гэм буруутай нь тогтоогдвол хариуцлагын шат буюу яллах шүүх хурлыг шүүхээс товлоно. Харин яллагдагч гэм буруутайгаа хүлээн зөвшөөрсөн тохиолдолд тав хоногийн завсарлага авч болдог ба энэ хугацаанд хохирол, хор уршгаа төлөх ёстой байдаг аж.

Б.Эрдэнэбат, Д.Сэргэлэн нарыг дараах хуулийн дагуу яллагдагчаар тооцон шүүж байна.

• Эрүүгийн хуулийн 17.3-2.2-т “Бодит байдлыг нуух замаар бусдыг төөрөгдөлд оруулж, урьдын харилцааны явцад бий болсон итгэлийг урвуулан ашиглаж бусдын эд хөрөнгийг залилж ноцтой хохирол учруулсан”,
• 18.6-2.2 дахь хэсгийн “Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан, түүний хууль бус эх үүсвэрийг нь нуун далдлах хэргийг байнга тогтвортой үйлдсэн”

Б.Эрдэнэбат нь “Дэм санхүүгийн нэгдэл” ХХК-ийн 100 хувь, "Ариг" банкны хувьцааны 60.46 хувийг эзэмшдэг байна. Харин Ш.Баярсайхан нь “Улаанбаатар импэкс”-ийн 100 хувь, "Ариг" банкны 39.54 хувийг эзэмшдэг, "Номин холдинг"-ийн удирдах зөвлөлийн даргаар ажилладаг аж. 

“Дэм санхүүгийн нэгдэл” нь банк, cанхүүгийн салбарт ажилладаг бол “Улаанбаатар импэкс” нь “Номин холдинг” ХХК-ийн охин компани бөгөөд импортлогч, үйлдвэрлэгчдийн бараа бүтээгдэхүүнийг хэрэглэгчдэд хүргэх ачаа тээвэр, тээвэр зууч, гаалийн баталгаат агуулахын үйлчилгээний салбарт ажилладаг байна.

Эх сурвалж: Gogo.mn