Хүнс, хөдөө, аж ахуй, хөнгөн үйлдвэрийн сайд асан Г.Батзориг, УИХ-ын гишүүн асан Д.Дамба-Очир, Г.Солтан нар шүүхээс ял сонсов. ЖДҮХС-гаас өөрийн хамаарал бүхий этгээдүүдэд зээл олгосон асуудлаар ийнхүү буруутгасан гэж олон нийт ойлгодог. Харин хачир дээрээ тэднийг яллах өөр шалтгаан байв уу гэх хардлага цухалзана.
Хэрэв тэд ЖДҮХС-гаас өөрийн хамаарал бүхий компани болон этгээдээр дамжуулж зээл авсан бол яг ижил “заалттай” Шадар сайд Я.Содбаатар, Хууль зүй, дотоод хэргийн сайд Х.Нямбаатар болоод өнөөгийн УИХ-д суугаа олон эрхэм хуулийн байгууллагын хаалга татахгүй байгаа нь хачирхалтай.
Шүүхээс наранд байх амьдралаа нарсаар сольсон дээрх нэр бүхий хүмүүстэй ижил хэрэг үйлдсэн атлаа нэг нь нарсанд, нөгөө нь парламентад суугааг нэхэн сурвалжилсаар байгаа билээ. Энэ удаад УИХ-ын гишүүн Н.Учралыг онцлов.
"Кембрижийн хөтөлбөр"ярьж, олонд танигдсан гэж болохуйц УИХ-ын гишүүн Н.Учралын хувьд түүний аавынх нь эзэмшдэг "Хүннү"ХХК 950 сая төгрөгийн зээл авсан. "Хүннү" групп 2014 оноос "Нью Хүннү Финанс" банк бус санхүүгийн байгууллага ажиллуулж эхэлсэн байдаг. Тэгэхээр Монгол Улсад хамгийн энэрэнгүй буюу жилийн гуравхан хувийн хүүтэй зээлийг банк бусаараа хэд нугалж, хэрхэн эргүүлснийг хэн мэдлээ. Ямартай ч энэ хүний ойр тойронд сарын дөрвөн хувийн хүүтэй банк бус бий.
      Гэхдээ хамгийн инээдтэй нь тэр жирийн иргэдийн боломжийг урдуур нь орж "халааслачихаад" хээв нэг "Би өнөөдөр төлчихнө" хэмээн тодорч суусан. Ядаж уучлаарай ч байхгүй шүү. Ийнхүү тэрбээр өдөрт нь ЖДҮХ санруу хуруу дүрсэн ч, бэлтэй хүн яахав, тэрбум төгрөгийг тэр дор нь шахуу шилжүүлж томорсон юм. Түүний орлого жилээс жилд нэмэгдээд, өдгөө тэрбумтан гишүүдийн эгнээнд зүй ёсоор багтжээ. Тухайлбал, тэрбээр төрийн дээд сэнтийд морилон гишүүн болохоосоо өмнө буюу 2015 онд жилийн 225 сая төгрөгийн цалинтай байсан. Харин 2016 онд 405 сая төгрөг, 2017 онд 377 сая төгрөг, 2018 онд 449 сая төгрөгийн орлого олжээ. Нэг үгээр гурван жилийн дотор эрхэм гишүүн орлогоо нэг дахин бөгтрүүлж, чаджээ. Мэдээж түүний энэ их орлогын эх үүсвэрийн тодорхой хувийг ЖДҮ-ээс авсан зээлийнх нь гавъяа байж таарна. Энэ мэтчилэн иргэдийнхээ боломжийг улаан цайм хумслан нүүрэн дээр бэлжих цагаан захтнуудад том ар, зоос мөнгө байхад хариуцлага гэдэг инээдэм биз ээ.

Нийгмийн толь