Ерөнхий сайд Л.Оюун-Эрдэнэ зөвлөхүүдээ томилжээ. Тухайлбал, А.Амундраг олон нийт, хэвлэл мэдээлэлтэй харилцах зөвлөхөөр, эдийн засгийн бодлого, төсөл хөтөлбөрүүдийг хариуцсан зөвлөхөөр Т.Хаш-Эрдэнийг, харин Л.Цэдэвсүрэнг Хууль зүйн бодлого хариуцсан зөвлөхөөр томилжээ. А.Амундрагийн тухайд саяхан МАН-д элссэн. Монголын медиа салбартаа тэргүүлэгч news.mn-ийг үүсгэн байгуулж ажил амжилтын гараагаа эхлүүлсэн тэрээр хэвлэл мэдээлэл, бизнесийн салбарын шилдэг менежерүүдийн нэг. Улс төрийн болон нийгмийн олон төсөл хөтөлбөрүүдийг санаачлан, удирдан хэрэгжүүлсэн туршлагатай.

Эдийн засгийн бодлого, төсөл хөтөлбөрүүдийг хариуцсан зөвлөх Т.Хаш-Эрдэнэ 2017 оноос МУ-ын Ерөнхий сайдын орон тооны бус зөвлөхөөр, 2018-2021 онд Ерөнхий сайдын дэргэдэх Эдийн засгийн бодлогын зөвлөлийн Ажлын албаны даргаар ажиллаж байсан. Түүнчлэн Монгол Улсын дунд, урт хугацааны хөгжлийн бодлого, төр, хувийн хэвшлийн хамтын ажиллагаа, банк санхүүгийн салбарын асуудлаар Засгийн газарт бодлогын зөвлөгөө өгөх, дэмжлэг үзүүлэх үндсэн чиг үүрэгтэй зөвлөлийн үйл ажиллагааг хариуцан ажиллахаас гадна “Алсын хараа 2050 - Монгол Улсын урт хугацааны хөгжлийн бодлого” боловсруулах Эдийн засгийн дэд ажлын хэсэгт гишүүнээр ажиллажээ. Нийгэм, эдийн засгийн, төрийн болон хувийн хэвшлийн байгууллагуудын хамтарсан төсөл хөтөлбөрүүд болон бизнесийн салбарт, төрийн албанд ажилласан туршлагатай.

Харин Хууль зүйн бодлого хариуцсан зөвлөх Л.Цэдэвсүрэнгийн тухайд 2020 онд Боловсрол, шинжлэх ухааны сайдаар ажилласан. 1994 онд МУИС-ийн хууль зүйн сургуулийг төгссөн, хуулийн магистр цолтой. Соёлын яамнаас ажлын гараагаа эхэлж, 1996-2000 онд Гэгээрлийн яаманд хуулийн зөвлөхөөр, 2000 оноос БСШУСЯ-нд хуулийн хэлтсийн даргаар, төрийн нарийн бичгийн даргаар тус тус ажилласан. Төрийн албанд 25 жил ажилласан туршлагатай.