Токио хотноо энэ оны долдугаар сарын 23-наас наймдугаар сарын 8-ны өдрүүдэд зуны XXXII олимпийн наадам, наймдугаар сарын 24-нөөс есдүгээр сарын 5-ны өдрүүдэд зуны XVI паралимпийн наадам болно. Монгол Улсын тамирчдын хувьд нийт 30 тамирчин Токиог зорихоор эрхээ аваад байгаа.
Токиогийн зуны олимп хойшлогдсоноос хойших жил шахмын хугацаанд дэлхийн дахинд коронавирусын халдварын нөхцөл байдал жилийн өмнөхөөс дээрдсэн гэж хэлэх аргагүй байгаа. Үүнээс үүдэн “Олимпыг хойшлуулж магадгүй” гэсэн яриа таамаг ид хөвөрсөөр. Гэтэл яг хоёр сарын дараа эхлэх "Токио-2020"-иос хагас жилийн дараа Бээжин хот өвлийн олимпийг хүлээж авах учраас “үүнээс цааш газар үгүй” гэдэгчлэн спортын хамгийн том наадмыг дахин хойшлуулах ямар ч боломжгүй болсон бөгөөд зөвхөн цуцлах л хувилбар бий. Мэдээж хэрэг, 2022 онд ганцхан жилийн дотор өвөл зуны хоёр олимпийг 5-6 сарын зайтай зохион байгуулах нь бүтэшгүй зорилт болоод байгаа юм.
Олимп ойртох тусам сүүлийн өдрүүдэд таагүй мэдээ сонсогдох боллоо. Цар тахлын улмаас гадаадын үзэгчид, хөгжөөн дэмжигчдийг хүлээн авах боломжгүй гэдгээ зохион байгуулагч Японы тал мэдэгдэв. Үүнтэй зэрэгцээд БНАСАУ-ын шигшээ баг Токиод очихгүй гэсэн шийдвэр гаргалаа. Хамгийн таагүй нь гэвэл, санал асуулгаар Японы иргэдийн 83 хувь нь “Олимпийг хойшлуулах эсвэл цуцлах нь зүйтэй” гэж үзэж байгаа. Өнгөрсөн сарын судалгаагаар оролцогчдын 68 хувь нь ийм санаа бодолтой байсантай харьцуулахад олимпын наадам дөхөх тусам эсэргүүцэгчдийн тоо улам нэмэгдэх төлөвтэй.
Санал асуулгатай бараг зэрэг шахуу Японы эмч нарын үйлдвэрчний эвлэлээс мэдэгдэл гаргаж, халдварын нөхцөл байдал маш хүнд байгаа учраас олимпийн наадмыг хойшлуулах эсвэл цуцлахыг эрх баригчдад хандан уриалсан байна. Тус улсад өдөр бүр халдварын 5000-гаас дээш тооны тохиолдол илэрч байгаа нь өнгөрсөн оны хавар тохиосон халдварын оргил үеийнхтэй ойролцоо байгааг эмч нар анхааруулжээ. Энэ мэтчилэн олон бэрхшээл сорилт тулгарч байгаа боловч "Токио-2020"-ийг зохион байгуулагчид “Олимп болно” гэдгийг итгэлтэйгээр хэлж байгаа бөгөөд гадаадын тамирчид, Японы иргэдийн аль алинд нь эрсдэл үүсгэхгүйгээр зохион байгуулж чадна гэдгээ ОУОХ ба Токио хотын засгийн газрын олимпод бэлтгэх товчоо амлалаа.
Монголчуудын хувьд “Токио-2020” олимпын наадам урьд өмнөх олимпын наадмуудаас онцлогтой бөгөөд Монгол Улсын спортын түүхэнд анх удаа багийн төрөлд өрсөлдөнө. Мөн ширээний теннисчид анх удаагаа олимпийн наадамд оролцох эрхээ аваад байгаа. Буудлагын спортын тамирчдын хувьд олимпийн эрхийн оноо авах тэмцээн дууссан бөгөөд дөрвөн тамирчнаа Токиод илгээх бол боксын төрөлд эцсийн байдлаар гурван ширэн бээлийтэн олимпод нударга зөрүүлнэ.
Ташрамд дуулгахад, түүхэндээ багийн төрлөөр анх удаа олимпийн эрх авсан эмэгтэй шигшээ баг долоон тамирчинтай бэлтгэлээ базааж байгаа бөгөөд үүнээс дөрвөн тамирчин нь Токиог зорих юм.
Эх сурвалж: Tumen.mn
