Жил бүрийн хавар барилгын ажил эхлэхтэй зэрэгцээд барилгын гол материалуудын үнэ өсдөг жишиг тогтоод удсан. Энэ жилийн хувьд хил гаалийн асуудалтай холбоотойгоор хомсдол бий болж, үнийн өсөлтийн давалгаа эрчимтэй явагдаж байна. Үүнээс үүдэлтэйгээр барилгын бүтээн байгуулалтын ажилд хүндрэл учраад буй юм. Тодруулбал, барилгын арматур 2021 онд нэг тонн нь 2.1 сая төгрөгийн үнэтэй байсан бол одоо 3.1 сая төгрөг болж, 50.9 хувиар, вакум цонх 210 мянган төгрөгөөс 400 мянган төгрөг болж 89.7 хувиар өсчээ. Энэ мэтчилэн, цемент, шохойноос эхлээд бүх төрлийн барилгын материалын үнэ нэмэгдсэн. Иргэдийн зүгээс хил хааснаар худалдаачид зориудаар үнийн хөөрөгдөл үүсгэлээ хэмээн хардаж бухимдлаа илэрхийлсээр байгаа бол худалдаа эрхлэгчид цаанаасаа үнэтэй ирж байгаа учраас яах ч аргагүй үнэ ээ нэмж байгаа хэмээн тайлбарладаг. Салбарын сайд нь ч эл асуудлыг хүлээн зөвшөөрч, худалдаа эрхлэгчил болон худалдан авагчдын хэн хэнд нь бурууг өгөх боломжгүй нөхцөл байдал үүссэн хэмээн онцолсон байдаг.

Үнэ өссөн шалтгааныг мэргэжилтнүүд тайлбарлахдаа,

• Дэлхий нийтээр тархаад буй "COVID-19"-ийн цар тахлаас үүдэн манай улсад бүх нийтийн бэлэн байдлын зэрэгт дөрвөн удаа ч шилжиж үйлдвэрлэгчид хэвийн тогтвортой ажиллах нөхцөл хангагдахгүй байсаар, түүхий эдийн татан авалт хийж чадахгүй, санхүүгийн хүндрэл бэрхшээлтэй тулгарсаар байгаад бүтээн байгуулалтын улиралтай золголоо.

• Дэлхийн зах зээлд түүхий эдүүд, импортоор оруулж байгаа материал, бүтээгдэхүүний үнэ өссөн, олдоц ховордсон, импортлогч БНХАУ-ын хил хорио, хязгаарлалтаас болж нийлүүлэлт багасч, тээвэрлэлт хүндэрч үнэ нь өссөн.

• Дотоодын жижиг үйлдвэрүүд БНХАУ-ын техник, технологиор үйлдвэрлэл явуулдаг ч ажиллах хүчний хомсдолтой, тоног төхөөрөмж, технологийн хоцрогдолтой байна.

• Ковид-19 цар тахлаас болж шаардлагатай гадаад мэргэжилтнүүд нь ирж чадаагүйгээс дотоодын жижиг үйлдвэрүүдийн ихэнх нь 2020-2021 онд үйлдвэрлэл явуулаагүй;

• Импортын нөөц бүрдүүлээгүйгээс дотоодын зах зээлд материалын хомсдол бий болсон зэрэг шалтгаантай байна.