Монгол Улсын Засгийн газрын шийдвэрээр “Бүсийн зөвлөлийн хуралдааныг бүс бүрд зохион байгуулж, бүсүүдийн хөгжлийн ерөнхий төлөвлөгөө боловсруулах, бүс тус бүрд шаардлагатай мега төслийг танилцуулж, хэлэлцүүлэх шийдвэр гарсан билээ.

Энэ хүрээнд “Хангайн бүсийн зөвлөл” анхдугаар хуралдаан өнөөдөр /2025.04.14/ Архангай аймгийн “Ара Арена” цогцолборт эхэллээ. Хуралдаанд Бүсээс сонгогдсон Улсын Их Хурлын гишүүд, Засгийн газрын гишүүд, төрийн захиргааны байгууллагууд, Хангайн бүсийн аймаг, сумдын удирдлага, хувийн хэвшил, олон улсын байгууллага, мэргэжлийн холбоод, эрдэмтэн, судлаачид, иргэдийн төлөөлөл оролцоно.

“Хангайн бүсийн зөвлөл” анхдугаар хуралдааны үеэр таван сэдвээр салбар хуралдаанууд зохион байгуулагдах бөгөөд ирэх 4 жилд хэрэгжих боломжтой бүсийн чанартай хөрөнгө оруулалтын төслүүдийг орон нутгийн иргэд, хөрөнгө оруулагчдад танилцуулж, санал, дүгнэлтийг хэлэлцүүлэх юм. Мөн үзэсгэлэн худалдаа, бүсийн брэнд бүтээгдэхүүн шалгаруулалт, Төслийн танилцуулга, B2B уулзалт, санамж бичиг байгуулах зэрэг дагалдах арга хэмжээнүүдийг хурлын үеэр зохиохоор төлөвлөж байна.