Ардчилсан Намаас Пүрэв гараг бүр зохион байгуулдаг мэдээллийн цагаараа хууль, шүүхийн үйл ажиллагаанд улс төрийн зорилгоор нөлөөлж байгаа асуудлыг хөндлөө. УИХ-ын гишүүн О.Алтангэрэл “Монгол Улсын 27 дахь Ерөнхий сайд Н.Алтанхуягтай холбоотой ээлжит нэгэн шүүх хурал яг одоо явагдаж байна. Энэ хэрэг 2017 оноос шалгагдаж эхэлсэн. 2022 оны дөрөвдүгээр сард Н.Алтанхуягийг яллагдагчаар татсанаас хойш дөрвөн жилийн турш үргэлжилж байна. Энэ хэргийг хянан шийдвэрлэх явцад түүнийг гурван удаа цагаатгасан. Энэ болгонд шүүхийн дараагийн шатыг эхлүүлж, цагаатгасан шийдвэрийг үл зөвшөөрч байгаа.

Н.Алтанхуяг Монгол Улсын Ерөнхийлөгчид нэр дэвшихээ ил тод илэрхийлсэн. Тэр бол Ерөнхийлөгчид өрсөлдөх кандидатуудын дунд хамгийн өндөр эрэмбэтэй улс төрч. 2027 оны Ерөнхийлөгчийн сонгуульд АН-аас нэр дэвших магадлалтай учраас энэ хэргийг удаашруулж, эрх баригч нөлөөлж байна гэж манай намын гишүүд үзэж байна. Тиймээс нэг төрлийн залхаан цээрлүүлэлт, хэлмэгдүүлэлт бол АН-ыг Ерөнхийлөгчийн сонгуульд амжилтгүй оролцуулах гэсэн эрх баригчдын нөлөөлөл байх вий гэсэн болгоомжлол бидэнд байна" гэв