Үе үеийн Засгийн газар эрчим хүчний үнийг нэмэхээс айж ирсэн. Яагаад гэхээр сонгогч олны дунд төр барьж байгаа намын нэр хүнд унана гэхээс айж ирсэн түүхтэй. Харин Эрчим хүчний сайдаар шинэхэн томилогдоод буй Б.Найдлаа “Эрчим хүчний үнийг нэмнэ” гэдгээ шуудхан хэлжээ. Үүнээс өөр арга байхгүй.

Бид урьд өмнө эрчим хүчний бие даасан байдлыг хангана хэмээн энд тэндгүй шав тавьж, зээл хуй тавьсан. Эхэлсэн нь ч бий, бүтэж боссон нь ч бий, гацсан нь ч бий. Эрчим хүч нэмэгдүүлэхэд уранаасаа илүүтэй гацаанд байгаа хэдэн усан цахилгаан станцаа хөдөлгөж, ашиглалтад оруулах нь чухал болоод байна.

Монгол Улсын эрчим хүчний салбар жилээс жилд л алдагдал хүлээж ирсэн алдагдлын акул салбар гэхэд болно. Тэгэхээр эрчим хүчний салбарын сүүлийн хэдэн жилийн алдагдлыг авч үзэхээр 2017 онд 18 тэрбум, 2018 онд 18.8 тэрбум, 2019 онд 59 тэрбум, 2020 онд 88.1 тэрбум, 2021 онд 77.8 тэрбум, 2022 онд 187.3 тэрбум, 2023 онд 74 тэрбум, 2024 онд 274 тэрбум, 2025 онд 190 тэрбум төгрөгийн алдагдалтай ажилласан гэх статистик бий. Үүнээс харахад эх үүсвэрүүдээс нэмэхийн зэрэгцээ эрчим хүчний үнийг нэмэхээс өөр арга байхгүй.

Жилдээ хэдэн зуун тэрбум төгрөгөөр алдагдал хүлээж байгаа салбарын алдагдлыг ялгаа байхгүй татвар төлөгчдийн мөнгөөр нөхдөг. Ард түмэн “Эрчим хүчний үнийг нэмэх нь буруу” гэж үздэг. Байнгын эсэргүүцэж, улстөрчдөд нөлөөлдөг. Гэтэл эрчим хүчний салбараас хүлээж байгаа алдагдлыг эргүүлээд “Эрчим хүчний үнийг нэмэх нь буруу” гэж байгаа нөхдийн халааснаас гардгийг ойлгох хэрэгтэй.

Ингэж байхаар эрчим хүчний үнээ нэмж алдагдлаа бууруулах, байхгүй болгочихоод татвар төлөгчид алдагдалд мөнгө өгөхгүй амьдрах хэрэгтэй. Үүнийг ойлгож ядаад байх зүйлгүй. Хамгийн наад зах нь үнэ нэмэхээр иргэд, аж ахуйн нэгжүүд эрчим хүчээ хэмнэнэ. Нар салхины гээд хямд эх үүсвэр эрэлхийлэхээс эхлээд хэмнэлт бий болно. Ерөөсөө Монгол Улсад эрчим хүчний үнийг нэмэхээс өөр сонголт байхгүй. Дэлхий дээр ийм хямд эрчим хүч ашиглаж байгаа улс орон ч байхгүй.