Дэлхийн хамгийн том бэлгэвч үйлдвэрлэгч Малайзын Karex Bhd компани Ираны дайнаас үүдэлтэй түүхий эдийн тасалдал цааш үргэлжилбэл бүтээгдэхүүнийхээ үнийг 20-30 хувиар, бүр үүнээс ч илүүгээр өсгөж болзошгүйг анхааруулжээ.

Мягмар гарагт хэвлэлд өгсөн ярилцлагадаа тус компанийн гүйцэтгэх захирал Го Миа Киат зардлын өсөлт, тээврийн саатал зэргийн улмаас олон харилцагчийнх нь нөөц ердийн үеийнхтэй харьцуулахад нэлээд багассан тул ийм арга хэмжээ авах төлөвлөгөөтэй байгаагаа хэлсэн байна.

“Нөхцөл байдал үнэхээр эмзэг, өртөг зардал өндөр байна. Бидэнд одоо зардлын ачааллаа хэрэглэгчдэд шилжүүлэхээс өөр арга алга” гэж тэр хэлжээ.

Karex компани жилд таван тэрбум гаруй бэлгэвч үйлдвэрлэдэг бөгөөд Durex, Trojan зэрэг алдартай брэндүүдийн нийлүүлэгч, НҮБ-ын эрүүл мэндийн төсөл хөтөлбөрүүдийн нийлүүлэгч юм.

Хоёрдугаар сарын сүүлээр Ираны дайн эхэлснээс хойш тус компани бэлгэвч үйлдвэрлэхэд ашигладаг синтетик резин, нитрилээс эхлээд сав баглаа боодлын материал, силикон тосны хомсдолтой тулгарсан гэнэ. Эдгээр нь бүгд газрын тосыг боловсруулах замаар гаргадаг материалууд юм.

Одоо Karex компанид ойрын цөөн хэдэн сар үйлдвэрлэл явуулахад хангалттай хүрэлцэх түүхий эд байгаа бөгөөд үүний дараа нөхцөл байдал хүндрэхийг Го хэлсэн байна.

Энэ онд бэлгэвчний дэлхийн зах зээлийн эрэлт 30 хувиар өссөн нь үүнд давхар нөлөөлж байгаа гэнэ.

Эх сурвалж: Reuters