Хүүхэд, гэр бүлийн хөгжил, хамгааллын ерөнхий газрын харьяа Сургалт судалгааны төвөөс 21 аймаг 9 дүүргийг хамарсан гурван төрлийн судалгааны ажлыг үе шаттайгаар зохион байгуулж 21 дэх аймагтаа ажилласан байна. Судалгааны баг Төв, Дундговь, Өмнөговь аймгуудад хүүхдийн эрх, аюулгүй байдал болон нийгмийн ажилтны мэргэжлийн чадавхтай холбоотой дараах үндсэн гурван чиглэлээр судалгаа авч ажиллалаа.

"Шударга байдал хүүхдийн нүдээр" чанарын судалгаа: Аймаг бүрийн 13–17 насны хүүхдүүдийг хамруулан чанарын ярилцлагын аргаар авч байна. Судалгааны гол зорилго нь хүүхдүүд "шударга байдал"-ыг хэрхэн ойлгож, хүлээн авч байгаа болон тэдний амьдрах орчинд шударга бус байдал үүсэхэд сөргөөр нөлөөлж буй хүчин зүйлсийг хүүхдүүдийн өөрсдийнх нь үзэл бодлоор дамжуулан илрүүлэхэд орших аж.

Гамшгийн үеийн хүүхэд хамгааллын арга зүй боловсруулах судалгаа: Онцгой байдал болон гамшгийн үед хүүхдийг хэрхэн хамгаалах, нийгмийн ажилтнууд ямар арга зүй, дараалал баримтлан ажиллах шаардлагатайг тодорхойлох зорилготой. Энэхүү судалгааны үр дүнд практикт шууд ашиглах боломжтой арга зүйн зөвлөмж боловсруулна.

Нийгмийн ажлын мэргэжлийн ур чадварын үнэлгээний судалгаа: Олон улсын жишгээр нийгмийн ажилтны ур чадварыг тухайн үзүүлж буй үйлчилгээнийх нь чанараар үнэлдэг. Иймд олон улсын шилдэг арга зүйг Монгол Улсад нутагшуулах, одоогийн үнэлгээний бодит байдлыг тодорхойлох зорилгоор уг судалгааг гүйцэтгэж байна.