Олон улсын хүүхдийн “Найрамдал” цогцолбор зуны улирлын үндсэн 9 ээлжийн хөтөлбөрөө амжилттай хэрэгжүүлж, энэ жилийн зуны сүүлийн ээлжийн хаалтын ажиллагаа өчигдөр болж өндөрлөлөө. Энэхүү хөгжлийн хөтөлбөрүүдэд 2025 онд 39,687 хүүхэд хамрагдсан бол 2026 оны 08 дугаар сарын байдлаар 25,403 хүүхэд амран, хөгжлийн үйлчилгээнд хамрагдаад байна.

Монгол Улсад төрийн өмчийн 6 хүүхдийн зуслан үйл ажиллагаа явуулдгаас Олон улсын статустай, дөрвөн улирлын турш тасралтгүй үйл ажиллагаа явуулдаг цорын ганц зуслан нь “Найрамдал” цогцолбор юм.

Манай улсад Хүүхдийн зуслан үүсэж, хөгжсөний 100 жилийн ой энэ жил тохиож байгаатай холбогдуулан Хүүхэд, гэр бүлийн хөгжил, хамгааллын ерөнхий газраас Монголын зуслангуудын холбоо болон “Найрамдал” цогцолбортой хамтран хүүхдийн зуслангийн салбарын хөгжлийг шинэ түвшинд хүргэх доорх бодитой ажлуудыг амжилттай зохион байгууллаа. Үүнд:

-Зуслангийн захирлуудын олон улсын сургалт (ICDC)-2026”

-Хүүхдийн зуслангийн хөгжил – 100” Олон улсын онол, практикийн бага хурал

-“Бүлгийн удирдагч багш бэлтгэх үндэсний сургалт”

Цаашид Монгол Улсад үйл ажиллагаа явуулж буй хүүхдийн зуслангуудын хөтөлбөрийн чанар, хүртээмжийг сайжруулах, дөрвөн улирлаар үйл ажиллагаа явуулдаг, олон улсын стандарт, шаардлагад нийцсэн зуслангийн тоог нэмэгдүүлэх чиглэлээр олон чухал ажлуудыг төлөвлөн ажиллаж байна.

Олон улсын хүүхдийн “Найрамдал” цогцолборын зуны үндсэн ээлжийг зорин ирж амарсан дуу хуур, инээд баяслаар дүүрэн хүүхэд багачууддаа болон хүүхдийнхээ хөгжлийг хүүхдийн зуслангаар дамжуулан дэмжин хамтран ажилласан нийт эцэг, эхчүүддээ гүн талархал илэрхийлье.

Ирэх сард “Найрамдал” цогцолборын үйл ажиллагаа “Тусгай ээлж”-ийн хөтөлбөрөөр үргэлжлэн явагдах болно.