Монгол Улсын Ерөнхий сайд, Хүүхдийн төлөө үндэсний зөвлөлийн тэргүүн Н.Учрал тус зөвлөлийн хуралдааныг гурав дахь удаагаа хуралдууллаа. Хурлын эхэнд Хүүхдийн төлөө үндэсний зөвлөлийн дүрэм, бүтэц, дэд зөвлөлийн үйл ажиллагааны зохион байгуулалтыг шинэчлэн баталсан.

-Шинэ бүтцийн хувьд:

-Хүүхдийн эсэн мэнд амьдрах эрхийн

-Хүүхдийн хөгжил, оролцооны

-Хүүхэд хамгааллын

-Хүүхдийн орчны аюулгүй байдал, урьдчилан сэргийлэх

Их өгөгдөл, дүн шинжилгээ хяналтын гэсэн таван дэд зөвлөлд хуваагдан, чиглэл бүрдээ ажиллахаар боллоо.

Хүүхдийн төлөө үндэсний зөвлөлийн хүрээнд Боловсролын яам, Эрүүл мэндийн яам, Соёл спорт аялал жуулчлалынн яам, Зам тээврийн яам, Аж үйлдвэр эрдэс баялагийн яам, Хууль зүй дотоод хэргийн яам, Хот байгуулалт барилга орон сууцжуулалтын яам, Эрчим хүчний яам, Байгаль орчин уур амьсгалын өөрчлөлтийн яам, Нийслэлийн ЗДТГ-аас хэрэгжүүлж буй ажлын явцыг хэлэлцэж тайлан тавилаа.

Шинэ дүрэмд зөвлөлийн гишүүнээр ажилладаг төрийн алба хаагч үүргээ биелүүлээгүй бол хариуцлага тооцох заалтыг оруулсан байна. Мөн Хүүхдийн төлөө “За бол заавал хийе” үндэсний хөдөлгөөний хүрээнд хэрэгжүүлж буй арга хэмжээний талаар Монгол Улсын Ерөнхий Сайд Н.Учрал танилцууллаа.

Хүүхдийн төлөө “За бол Заавал хийе” ажлын хүрээнд:

21 аймаг, 9 дүүрэгт олон улсын стандартад нийцсэн 5х5 сагсан бөмбөгийн талбай байгуулах ажил хэрэгжиж эхэлсэн.

Хотын даргад үүрэг өгсний дагуу Сүхбаатарын талбайн баруун талд байрлах Нийслэлийн захиргааны байрыг “Хүүхдийн ордон - 2” болгох ажил эхэлж, 60%-тай үргэлжилж байна.

Хотхоны бага, төрөлжсөн ахлах, олон улсын хөтөлбөртэй сургуультай болох ажил эхэлсэн

Зуны амралт эхэлсэнтэй холбогдуулан сургуулийн спорт заал, гадна ногоон байгууламж нээх ажил эхэлсэн

17 жил царцсан “Хандгайт” зусланг ОХУ-тай хэлэлцсэний үр дүнд Монголын талд шилжүүлэн авах ажил эхэлсэн. Асуудал шийдэгдсэний дараа зусланг зориулалтын дагуу сэргээн засварлаж ажиллахыг Хотын дарга Б.Пүрэвдагвад үүрэг болголоо.

Зуны амралт, баяр наадмын үеэр хүүхдийг үер усны осол болон бусад эрсдэлээс хамгаалах ажлыг эрчимжүүлж, хурдан морь унаач хүүхдийн аюулгүй байдлыг ханган даатгалд бүрэн хамруулахыг холбогдох байгууллагуудад үүрэг болголоо.