Йемений төвийн бүсийн Таиз хотын шоронгоос 1200-гаад хоригдол оргосны дунд “Аль-Кайда”-гийн сэжигтнүүд ч байсан талаар“ВВС” мэдээлжээ. Эх сурвалжийн мэдээлснээр, орголтоос өмнө шоронд хоригдлууд болон харгалзагч нарын хооронд зөрчилдөөн болсон бөгөөд хоригдлууд хэрхэн оргосон нь одоогоор тодорхойгүй байгаа аж. Гэхдээ “Аль-Кайда”-гийн дэмжигчид шоронд халдсан байж болзошгүй гэсэн таамаг байгаа юм байна. Энэ нь Саудын Араб тэргүүтэй олон улсын хамтарсан арми өнгөрсөн гуравдугаар сарын 26-нд агаарын довтолгооны кампанит ажил эхлүүлснээс хойшхи гурав дахь томоохон шоронгийн орголт болж байгаа юм. Зэвсэгт босогчид үймээн дэгдээж, Ерөнхийлөгч Абдраббух Мансур Хади Саудын Араб руу зугтааснаас хойш Йемен улс мөргөлдөөн, эрх мэдлийн төлөөх тэмцлийн хөлд үрэгдсээр өдий хүрээд байгаа юм.