эдийн засгийн өнөөгийн хүндрэлтэй байдлаас үүдэн Ерөнхий сайд Ч.Сайханбилэг 2015 онд цалин нэмэх асуудлыг ирэх жилийн төсөвт шилжүүлэхээс аргагүй болсон талаар Үйлдвэрчний эвлэл, Ажил олгогч эздийн холбоотой гурван талт хэлэлцээр хийхийг Хөдөлмөрийн сайд Г.Баярсайханд үүрэг болгож, нөхцөл байдлаа зөв танилцуулж, харилцан ойлголцох учиртайг анхааруулсан.

Үүнтэй холбогдуулан өнөөдөр Хөдөлмөрийн яам, Монголын Үйлдвэрчний эвлэлүүдийн холбоо, Монголын Ажил олгогч эздийн нэгдсэн холбоод хамтран төрийн албан хаагчдын цалинг энэ онд нэмэхгүй байх зөвшилцөлд хүрчээ.

Энэ талаар УИХ-ын гишүүн, Хөдөлмөрийн сайд Г.Баярсайхан “Цалин нэмэх асуудал нь Засгийн газрын хамгийн чухал асуудлын нэг хэвээр байгаа. Гэвч энэ хямралтай үед цалинг нэмэхэд хүндрэлтэй тусах учраас гурван тал ойлголцолд хүрч тодорхой уриалга гаргалаа. Засгийн газрын хувьд төсвийн ерөнхийлөн захирагч нар аймаг, дүүргийн Засаг дарга нар төрийн оролцоотой байгууллагуудын захирлуудад хэмнэлтийн горимдоо шилжих зайлшгүй шаардлага байгааг уриалгаараа дамжуулж мэдэгдэж байна. Энэ хүнд үед хэмнэлтийн бодлогод шилжих шаардлага байна. Монголчууд бид уул уурхайн баялгийн хэт үнийн өсөлт дээр олон жил баруун, солгойгүй мөнгө цацсан. Одоо монгол гэж айлыг цаашид авч явахын тулд байгаагаа ухаалаг зарах ёстой. Зайлшгүй шаардлагатай зүйлдээ мөнгөө зарна. Ийм учраас төрийн өндөр албан тушаалтнууд улс төрийн албан тушаалтнуудын цалинг 25-30 хувь бууруулах шийдвэрийг Засгийн газар гаргасан. Энэ оны төсвийн тодотголоор хэмнэлтийн жагсаалт орж ирнэ. Гэхдээ бид ирэх жил цалинг тодорхой хувиар нэмэх бодлого барина, энэ хүрээндээ 2016 оны улсын нэгдсэн төсөвт шаардлагатай хөрөнгийг тусгаж өгөхөөр асуудлыг тусгасан” гэж мэдээллээ.

Монголын Үйлдвэрчний эвлэлүүдийн холбооны ерөнхийлөгч Х.Амгаланбаатар “Манай холбоо бол төрийн албан хаагчдын цалин хөлсийг нэмэгдүүлэх байр суурин дээр тууштай байгаа. Гэхдээ энэ асуудлыг Монгол Улсын Засгийн газар хэлэлцээрээр хүлээсэн үүргээ тууштай биелүүлнэ гэсэн амлалтыг өгч байгаа учраас цаг хугацааны хувьд хойшлуулж байна. Тийм ч учраас энэ уриалгад оролцож байгаа. нийгмийн зөвшлийн гурван талт хороо хуралдаж нэмэлт хэлэлцээрийг байгуулах ёстой. Нэмэлт хэлэлцээрийн хүрээнд хэдийнээс хэдий хугацаанд цалинг нэмэх вэ гэдэг асуудал тодорхой болно. Тэгэхээр 2015 оны цалин хөлсийг нэмэгдүүлэх 90 тэрбум дээр ирэх онд бас хэдэн хувиар нэмэгдүүлэх вэ гэдэг нэмэлт эх үүсвэрийн асуудал, нэмэлт хэлэлцээрийн хүрээнд яригдана. Тэгж байж цалин хөлсний асуудлыг ярихгүйгээр 2015 оныхыг 2016 он руу шилжүүлээд энэ асуудлыг хааж байгаа юм биш. Ийм байр суурийг Засгийн газар илэрхийлж байгаа учраас нийгмийн түншлэлийнхээ зарчмыг баримталж уриалгыг хамтдаа гаргаж байгаа” гэв.