Монгол түмэндээ зориулав.


Шуурхай мэдээ

“ЭЕРЭГ МОНГОЛ” чуулган боллоо

Нийтэлсэн: Монгол Хүү | Нийгэм
2020 09 сар 24 ・ 290

 

 

Тогтвортой хөгжилд хүрэх дэлхийн нийтийн урт хугацааны бодлогыг чиглэл болгон нийгэмд үйлчилдэг байгууллагуудын төлөөлөл хооронд мэдлэг, туршлагаа солилцон, хамтран ажиллах зорилготой чуулганыг “JCI Монгол” ТББ-ын санаачилгаар Монгол Улсын Ерөнхий Сайдын ивээл дор зохион байгуулж байсан билээ.

 

Тус чуулганыг Монгол дахь НҮБ-ын Суурин төлөөлөгчийн газар, Монголын Улаан загалмай нийгэмлэг, Монгол дахь Ротари клуб хамтран зохион байгуулсан юм. Чуулганд 100 орчим байгууллагын 200 гаруй төлөөлөгч оролцож, Монгол Улсын хэмжээнд хэрэгжиж буй 140 гаруй төсөл хөтөлбөрийг танилцуулсан байдаг.

 

Чуулганд оролцогчид Тогтвортой хөгжлийн зорилгуудын ижил төстэй төсөл хөтөлбөрүүдийг хамтатган нэгдсэн зохион байгуулалтаар илүү далайцтай ажиллах талаар хэлэлцэж, дээрх төслүүд нь нийгэмд  эерэг өөрчлөлтүүдийг үзүүлж байгаа хэмээн дүгнэсэн юм.

Тиймээс энэ жил тус чуулганыг дахин JCI Монгол ТББ-аас санаачлан зохион байгуулах гэж байна. Энэ удаад дэлхий даяар тархаад буй цар тахал болох “Ковид-19” өвчлөлөөс шалтгаалан цахим хэлбэрээр зохион байгуулж буйгаараа онцлог болох аж.

 

2019 онд “ЭЕРЭГ МОНГОЛ” нийгэмд үйлчилдэг байгууллагуудын нэгдсэн чуулган нэрээр зохион байгуулагдаж байсан бол энэ жил “ЭЕРЭГ МОНГОЛ нийгэмд үйлчилдэг байгууллагуудын оролцооны чуулган хэмээн нэрээ багахан өөрчилж,  хэлэлцүүлэх сэдвийн онцлогийг тусгасан байна.

 

Энэ жилийн чуулган нь “Тогтвортой хөгжлийн зорилгыг Монголд хэрэгжүүлэх” нэгдсэн зорилгын дор “Бизнесийн оролцоо”, “Иргэдийн оролцоо”, “Нийгэмд үйлчилдэг байгууллагуудын оролцоо”, “Хамтын ажиллагааг бий болгох нь” зэрэг сэдвүүдээр хэлэлцүүлэг өрнүүлэх юм.

 

Тухайн салбартаа манлайлагч, нийгэм, олон нийтэд танигдсан хувь хүн, байгууллагуудыг чуулганы хэлэлцүүлэгт урин оролцуулахыг зорьж байгаа талаар зохион байгуулагчийн зүгээс мэдээлэж байна.

 

“Хүн төрөлхтөний гэрийн даалгавар” хэмээн “хочлогдоод” буй “Тогтвортой хөгжлийн зорилго-2030” нь 2015 онд НҮБ-ын Ерөнхий Ассамблейн 70 дугаар чуулганаар улс орны тэргүүнүүдийн баталсан нийгэм, эдийн засаг, байгаль орчин зэрэг гурван тулгуурт суурилан тогтвортой хөгжилд хүрэх дэлхийн нийтийн урт хугацааны бодлогын баримт бичиг бөгөөд 17 зорилго, 169 зорилт, 244 шалгуур үзүүлэлттэй юм.  (Дэлгэрүүлэн унших бол http://sdg.1212.mn/Home/Index )

 

“ЭЕРЭГ МОНГОЛ” нийгэмд үйлчилдэг байгууллагуудын оролцооны чуулганыг 2020 оны 09 дүгээр сарын 23, 24-ний өдрүүдэд телевизүүдээр цацагдах ба энэхүү эерэг санаачлагыг дэмжин олон нийтэд хүргэхээ мэдэгдсэн ТВ9, 25 дугаар суваг телевиз, VTV болон Боловсрол суваг телевизүүдээр гарах юм байна.

Мөн энэхүү цахим чуулганы зохион байгуулахад гүн туслалцаа үзүүлж ерөнхий ивээн тэтгэчээр хамтран ажилласан “ОРХОН МОЛЛ” худалдааны төвийн хамт олонд талархаж буйгаа зохион багуулагчдын зүгээс илэрхийлснийг дамжуулж байгаадаа таатай байна.   


Таньд манай мэдээ, мэдээлэл таалагдаж байвал "LIKE" дарж бидэнтэй нэгдээрэй