"Солонго-1", "Солонго-2" орон сууцны хороолол төсөл нь Улаанбаатар хотын Хан-Уул дүүргийн 21 дүгээр хорооны нутаг дэвсгэрт нийт 5002 айлын орон сууц барих томоохон бүтээн байгуулалт юм БНСУ-ын Эксим банкны хөнгөлөлттэй зээлийн санхүүжилтээр "Төрийн орон сууцны корпораци" болон БНСУ-ын "Колон Глобал" компани хамтран хэрэгжүүлж буй “Солонго 1" болон "Солонго 2” төслийн эхний ээлжийн 2042 айлыг “Төрийн өмчийн орон сууцыг иргэнд хөлслүүлэх, өмчлүүлэх журам”-ын шалгуураар цахимаар сонгон шалгаруулна. Энэхүү ажлыг аравдугаар сарын 10-наас эхлүүлж, 14 хоног зохион байгуулахаар төлөвлөж буйг Хот байгуулалт, барилга, орон сууцжуулалтын сайдын ээлжит шуурхай хуралдаанаар мэдээллээ. Нийслэл хотын төвлөрлийг сааруулах, зорилтот бүлгийн иргэдийг орон сууцжуулах Төрийн бодлогын хүрээнд хэрэгжүүлж буй энэхүү төсөл нийт 5002 айлын орон сууцнаас бүрдэнэ. Төсөл нь 42-52 метр квадрат талбайтай, хоёр болон гурван өрөө байртай бөгөөд нэг метр квадратын үнэлгээг 4.4 сая төгрөгөөр тогтоогоод байна. Харин түрээсийн үнэ нэг метр квадрат тутамд 11,000-15,000 төгрөг байна. Өөрөөр хэлбэл 50 метр квадрат талбай бүхий орон сууцыг 550,000-750,000 төгрөгөөр түрээслэх аж. "Залуус”, ”Ногоон нуур”, “Солонго" зэрэг орон сууцны төслийн урьдчилгаа төлбөрийг 30 хувь биш, 15 хувь болгох асуудал Ерөнхий сайд Н.Учралын танилцуулсан есөн шийдвэрт багтсан юм. Ингэснээр босго хоёр дахин намсаж буй. Орон сууцны 50 хувийг ипотекийн зээлээр, 50 хувийг түрээслээд өмчлөх шинэ зохицуулалт хийгдэнэ.