АСОСАИ-н 8 дугаар бага хуралд Үндэсний аудитын газар сайн туршлагаа хуваалцав

Тайландын Хаант улсын Үндэсний аудитын газраас зохион байгуулж буй АСОСАИ-н 15 дугаар чуулга уулзалт өнөөдөр (2021.09.08) “Ковидын дараа хэвийн байдалд шилжих-Сорилтуудыг даван туулах нь” сэдвийн хүрээнд 8 дугаар цахим бага хурал амжилттай болж өндөрлөлөө.

АСОСАИ-н 8 дугаар бага хурлын төлөөлөгчид,

  • Цар тахлын дараагийн хэвийн байдалд сайн засаглалыг дэмжих нь
  • Тогтвортой хөгжлийн зорилтуудын ахиц дэвшилд дэмжлэг үзүүлэх нь
  • Төрийн аудитын салбарт дэвшилтэт технологийг хөшүүрэг болгон ашиглах нь
  • Цар тахлын улмаас үүсч буй эрсдэлд хариу үйлдэл үзүүлэх нь зэрэг дэд сэдвээр илтгэл тавьж, дэлхий нийтэд нүүрлээд буй Ковид-19 цар тахлаас сэргийлэх, хариу үйлдэл үзүүлэх, технологийн дэвшлийг төрийн аудитын үйл ажиллагаанд ашиглан цахим аудитыг хөгжүүлэх чиглэлээр хэрэгжүүлсэн үйл ажиллагаагаа танилцуулж, сайн туршлагаа солилцов.

Тус хуралд Үндэсний аудитын газрын Нэгдүгээр газрын захирал, тэргүүлэх аудитор Ц.Энхжавхлан “Цар тахлаас үүссэн эрсдэлд ҮАГ-аас хэрэгжүүлсэн арга хэмжээ” сэдэвт илтгэл тавьж, хэлэлцүүлэв.

Тэрбээр Монгол Улсад төрийн хяналт шалгалтын байгууллага үүссэний 100 жилийн ой ирэх 2022 онд тохиож буйг илтгэлийнхээ эхэнд онцлоод, цар тахлын үед Үндэсний аудитын газраас хэрэгжүүлсэн арга хэмжээний талаар танилцуулав. Тус илтгэлд “Нэг хаалга-Нэг шинжилгээ” болон “Вирусийн эсрэг эм, эмийн бүтээгдэхүүний худалдан авалт”-д хийсэн бодит цагийн аудитуудын үр дүн мөн Дэлхийн банкны санхүүжилтээр хэрэгжиж буй “Монгол Улсын Ковид-19 цар тахлын онц байдлын үед авч хэрэгжүүлсэн хариу арга хэмжээ, эрүүл мэндийн тогтолцооны бэлэн байдал”-д хийсэн санхүүгийн аудитын талаар туршлагаа хуваалцсаныг бодит цагийн аудитын ач холбогдлыг таниулсан сайн туршлага боллоо хэмээн зохион байгуулагчид онцлов.

Дашрамд дурдахад, АСОСАИ-н 16 дугаар чуулга уулзалт 2024 онд Бүгд Найрамдах Энэтхэг Улсад зохион байгуулагдах бөгөөд 2022-2024 оны АСОСАИ-н даргалагч орноор Тайландын Хаант улсын Үндэсний аудитын газар сонгогдсон юм.

⇐ Европын холбооны сонгуулийн ажиглагчид ҮАГ, ННФ-ын хамт олонд талархал илэрхийлэв
УЛААНБААТАР ХОТОД ӨДӨРТӨӨ 6-8 ХЭМ ДУЛААН БАЙНА ⇒
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!