Шинээр илрэх COVID-19-ийн тохиолдол буурахын хэрээр эмнэлэгт хэвтэн эмчлүүлж буй иргэдийн тоо багасаж байна.
Тодруулбал, долоо хоногийн өмнө буюу арванхоёрдугаар сарын 7-ны өдөр халдварын улмаас эмнэлэгт 4,259, гэрийн хяналтад 7,828 хүн эмчлүүлж байсан бол өнөөдрийн байдлаар улсын хэмжээнд 8,047 иргэн гэртээ болон эмнэлэгт эмлүүлж байна.
Өөрөөр хэлбэл, долоо хоногийн хугацаанд эмнэлэгт хэвтэн эмчлүүлэгчийн тоо 1,334-өөр, гэрийн хяналтад байсан иргэдийн тоо 2,706-аар буурсан буюу эндэгдлийг тооцолгүйгээр 4,025 иргэн эдгэрч тусгаарлалтаас гарсан гэж тооцож болохоор байна.
Мөн хугацаанд хүндэвтэр хүний тоо 596, хүнд хүний тоо 203-аар, маш хүнд хүний тоо 41-ээр буурчээ.
Одоогоор хөнгөн хэлбэрийн оноштой 5,122 хүн өрхийн эмчийн хяналтад гэртээ тусгаарлагдан эмчлүүлж байгаа бол 2,925 хүн эмнэлэгт хэвтэн эмчлүүлж байгаа юм.
Эмнэлэгт байгаа иргэдийн 36.8 хувь нь хөнгөн оноштой бол 63.1 хувь нь биеийн байдал хүндэвтрээс маш хүнд байна.
Тодруулбал,
- Хөнгөн оноштой – 1,079
- Хүндэвтэр оноштой – 1,508
- Хүнд оноштой - 287
- Маш хүнд оноштой – 51 хүн эмнэлэгт хэвтэн эмчлүүлж буй. Мөн эмнэлэгт байгаа иргэдийн 537 нь хүүхэд бол 129 нь жирэмсэн эмэгтэй байна.
Халдварын оргил үед буюу хоногт 3,000 гаруй тохиолдол шинээр илэрч байх үед эмнэлгийн орны ачаалал дээд хэмжээнд хүрч, халдварын улмаас эмчлүүлэгчдийн тоо 90,000-ыг давж байв.
Ташрамд дурдахад, Эрүүл мэндийн яамнаас эдгэрсэн тохиолдлын тоог тусад нь мэдээлэхээ больсон бөгөөд өдөр бүр зөвхөн PCR шинжилгээгээр эерэг гарсан тохиолдлыг мэдээлж буй. Харин түргэвчилсэн тестээр эерэг гарсан эсвэл шинж тэмдэг илэрсэн иргэдийг энэ тоонд оруулж тооцохгүй, зөвхөн эмчилгээ хийж байгаа юм.
Өнөөдрийн байдлаар халдвар аваад эдгэрсэн тохиолдол 701,171-д хүрээд буй.
COVID-19 халдвартай холбоотой болон вакцинжуулалтын явцын талаарх дэлгэрэнгүй мэдээллийг ЭНДЭЭС харах боломжтой.
