Засгийн газрын ээлжит хуралдаанаас гаргасан шийдвэрийг танилцуулах үеэр Байгаль орчин, уур амьсгалын өөрчлөлтийн сайд Ц.Сандаг-Очир Нөмрөгийн дархан цаазат газарт гарсан түймрийн нөхцөл байдал, учирсан хохирол болон цаашид авах арга хэмжээний талаар мэдээлэл өглөө.

Тэрбээр "Нөмрөгийн дархан цаазат газарт гарсан түймрийн улмаас нийт 468 га газар шатсан. Шатаагүй үлдсэн бага хэмжээний газарт олон тооны амьтан бөөгнөрсөн нөхцөл байдалтай байна. Иймд Засгийн газраас 629 сая төгрөгийн зардал гаргаж, биотехнологийн арга хэмжээ авахаар болсон. Мөн Хил хамгаалах ерөнхий газартай хамтран ажиллаж байгаа бөгөөд ойрын хугацаанд Нөмрөгт ажилласан 50 гаруй хүний бүрэлдэхүүнтэй багийн ажил дууссан гэв.

Мөн түймрийн улмаас учирсан хохирлын эцсийн үнэлгээг арваннэгдүгээр сарын 16-ны дотор тогтоох ёстой бөгөөд Нөмрөгтэй холбоотой гарсан бүх зардлыг хохиролд тооцож, хариуцагч компаниар нөхөн төлүүлэхээр ажиллаж байгааг онцоллоо.

Түүнчлэн 2022 онд хийсэн судалгаагаар Нөмрөгийн дархан цаазат газарт 14 мянган туурайтан амьтан байх боломжтой гэж тооцсон байна. Эрдэмтэн, судлаачдын зүгээс цаашид тус газарт эрдэм шинжилгээ, судалгаа, мониторингийн төв байгуулах шаардлагатай гэсэн санал гаргасан гэв.

Мөн орон нутгийн иргэд, аж ахуйн нэгж, залуучуудаас байгаль хамгаалах, ан амьтдыг хамгаалах үйлсэд хандив, тусламж үзүүлэх санаачилга гарч байгааг дурдав. Үүнтэй холбоотойгоор аймгийн Онцгой комиссын дэргэд сан байгуулж, аймаг зохион байгуулалтыг хариуцан ажиллах боломжтойг хэллээ. Иймд хандив, тусламж үзүүлэх хүсэлтэй аж ахуйн нэгж, байгууллагууд аймгийн Онцгой байдлын газарт хандаж, тухайн санд санхүүжилт төвлөрүүлэх боломжтой гэв.