“Улаанбаатарын үүд” дүүрэг хэмээн нэрийддэг Хан-Уул дүүрэгт 2017 оноос “Хоггүй эко” дүүрэг аян өрнүүлээд зогсохгүй сүүлийн жилүүдэд бүтээн байгуулалт ихээхэн өрнөж байна. Тус дүүрэг нь Монгол Улсын анхны үйлдвэрийн яндан дуугарч, “Ажилчны дүүрэг” хэмээн нэрлэгдэж байснаараа онцлог. Тэгвэл Хан-Уул дүүргийн Засаг даргын 2021-2024 оны үйл ажиллагаанд тусгагдасны дагуу “Хоггүй Хан-Уул” зорилт дэвшүүлэн ажиллаж байгаа бөгөөд энэхүү ажлынхаа хүрээнд хог тээвэрлэлтийн компаниудад автомашин хүлээлгэн өгч парк шинэчлэл хийжээ. Дүүргийн хог тээвэрлэлтийн компаниудад парк шинэчлэлт хийх ажлын эхлэл болгож, тус компанид 10м3 хог шахаж, ачих үйлдэлтэй “Камаз” маркийн дөрвөн автомашины түлхүүр гардуулан өгчээ.
Тус компанид сүүлийн 10 гаруй жил парк шинэчлэл хийгээгүй, хог тээвэрлэх зориулалттай автомашины ихэнх нь ашиглалтын хугацаа дууссан, эвдрэл гэмтэлтэй, засвар үйлчилгээ ихтэй байсан учраас 2021 онд хог тээврийн дөрвөн “Камаз”, зургаан “Хьюндэй” маркийн 10 автомашин, 2022 онд 12 хог тээврийн автомашиныг шийдвэрлэн өгснөөр хог тээврийн компаниудын ажлын бүтээмж 20 хувиар сайжирна гэж үзжээ.
Тиймээс автомашин гардуулах үеэр Хан-Уул дүүргийн Засаг дарга Ж.Алдаржавхлан “Монгол Улсын Засгийн газраас 21 аймаг, Нийслэлийн есөн дүүргийн хэмжээнд “Хоггүй, цахим, ногоон” болох гурван уралдаан зарласан. Эко-Эрүүл дүүргийн иргэдийн амьдрах орчныг цэвэрхэн байлгахын төлөө цаг наргүй үүрийн гэгээнээс үдшийн бүрий хүртэл ажилладаг ТҮК-ийнхан, бүх ажилчиддаа талархал илэрхийлж, ажлын өндөр амжилт хүсье” хэмээв.
