Нийслэлийн нутаг дэвсгэрт хууль тогтоомж, стандарт, шаардлагад нийцүүлэн, зөвхөн бүртгүүлсний үндсэн дээр ирэх сарын 1-нээс эхлэн 74 төрлийн худалдаа, аж ахуйн үйл ажиллагааг чөлөөтэй эрхлэх нөхцөл, боломжийг нээж байгаа талаар Нийслэлийн Засаг дарга бөгөөд Улаанбаатар хотын Захирагч Д.Сумъяабазар өчигдөр мэдээллээ. Өөрөөр хэлбэл, дээрх 74 төрлийн худалдаа, аж ахуйн үйл ажиллагааг эрхлэхдээ тусгай зөвшөөрөл авах шаардлагагүй болно гэсэн үг. Худалдаа үйлдвэрлэл, үйлчилгээ эрхэлж буй иргэн, аж ахуйн нэгжүүд зөвшөөрөл авахын тулд 7-12 бичиг баримт бүрдүүлдэг. Энэ нь нийт аж ахуйн нэгжийн хэмжээгээр тооцвол 168 мянган бичиг баримт бүрдүүлэхэд хүрдэг байна. Бичиг хэргийн зардалд 42 сая, тээврийн зардалд 149 сая, нийт 191 сая төгрөгийг зарцуулдаг. Тэгэхээр энэ бүх зардлыг хэмнэж, аж ахуйн нэгжүүдээ дэмжих үүднээс энэхүү шийдвэрийг гаргаж байгаа талаар тэрээр хэллээ. Энэхүү шийдвэр гарснаар нийслэлийн есөн дүүргийн хэмжээнд худалдаа, үйлдвэрлэл, үйлчилгээний чиглэлээр үйл ажиллагаа эрхэлж буй 18664 иргэн, аж ахуйн нэгж, байгууллага цаашид тусгай зөвшөөрөл авах, жил бүр дүүргийн Засаг даргын Тамгын газарт үйл ажиллагаа эрхлэх зөвшөөрлөө сунгуулах шаардлагагүй болж байна. Ингэснээр худалдаа, үйлдвэрлэл, үйлчилгээ эрхэлж буй 20 мянга орчим иргэн, аж ахуйн нэгж, байгууллагад бодит хэмнэлт, үр дүн гарна гэж тооцоолжээ.

- Бөөний худалдааны төв

- Агуулах дэлгүүр

- Худалдааны төв

- Зах /барилгын материал, мод, автотехникийн г.м/

- Их дэлгүүр, Хайпермаркет, Супермаркет

- Үзүүлэнгийн танхим

- Аутлет, Бутик

- Минимаркет, Хүнсний дэлгүүр

- Сүлжээ, төрөлжсөн барааны дэлгүүр

- Мухлаг, ТҮЦ

- Улирлын чанартай, түр, сүүдрэвчтэй худалдаа

- Дахивар худалдан авах цэг

- Ресторан, Баар /диско, билльярд, караоке, бусад/

- Кафе, Цайны газар, Кофе шоп

- Түргэн үйлчилгээний болон сүлжээ хоолны газар

- Явуулын үйлчилгээтэй түргэн хоолны цэг

- Үсчин, Гоо засал, Хумс засал

- Хувцас, гутал захиалга, засвар

- Гэр ахуйн тавилгын захиалга, засвар

- Ахуйн электрон, цахилгаан хэрэгслийн засвар

- Алт, мөнгө, үнэт эдлэлийн захиалга, засвар

- Цүнх, нүдний шил захиалга, засвар

- Цоож, түлхүүр, цаг засвар

- Хими цэвэрлэгээ, угаалга

- Гэрэл зураг, дүрс бичлэгийн үйлчилгээ

- Гэр цэвэрлэх, айл нүүлгэх үйлчилгээ

- Эд бараа түрээслэх үйлчилгээ

- Зочид, дэн, гэр буудал

- Жуулчны бааз, Амралтын газар

- Нийтийн халуун ус, саун, бассейн

- Чийрэгжүүлэлтийн төв

- Алжаал тайлах төв

- Нийтийн бие засах газар

- Авто, дугуй засвар /агрегат, кузов/

- Автомашины угаалга, доторлогоо, сэлбэг хэрэгсэл

- Авто зогсоол /битүү, ил/

- Хүүхдийн тоглоомын төв

- Нийтийн байрны үйлчилгээ

Б.ТӨГС

Эх сурвалж: “Зууны мэдээ” сонин