Төв Азийн өндөрлөгт ул мөрөө арилахааргүй үлдээсэн хүннүчүүдийг монголчуудын эртний удам угсаа гэж үздэг учраас Монголд төр оршин тогтноод 2230 жилийн түүхийг бүтээжээ. Хүннүг нүүдэлчдийн байгуулсан эзэнт гүрний дотроос анхных бөгөөд хамгийн удаан хугацаанд оршин тогтносон гүрэн гэж үздэг. Үүнээс үзэхэд үл тасрах Монгол төрийн гал голомт нэн эртнээс үүсэлтэй гэдэг нь харагдана.

Үүнээс хойш эзэн Чингис хаан 1206 онд Их Монгол Улсаа байгуулж, “Их засаг” хуулиа засаглан мандаж байсан цагаас хойш 815 жил өнгөрчээ. Их Монгол Улс мандан бадарч явсан олон жилийн түүхтэй ч манжууд 1636 онд Өвөр Монголыг бүрэн эзэлж аваад зургаан чуулганд хуваан, улмаар ар Монголыг эзэлсэн нь Их Монгол Улсын түүхийг бүдгэрэхэд хүргэсэн.

Иймээс монголчууд харийн эрхшээлд 220 жил бөхөлзөж, үе үеийн эх оронч зоригт хөвгүүдийн амь насаар 1911 оны эрх чөлөөний хувьсгалыг хийсэн юм. Монгол Улсад хүчирхэг мандсан Манжийн төрийг түлхэн унагааж, Богд хаант төрийг байгуулсан цагаас эхлэн, шинэ цагийн төр, засгийн тогтолцоо үүссэн гэж үздэг.

Тэр тусмаа Богд хаант засгийн бүтцэд тэргүүлэх үүрэг хүлээсэн Дотоод хэргийг бүгд захиран шийтгэх яам нь үйл ажиллагаа, хүлээсэн үүргийн хувьд өдгөөгийн Засгийн газрын хэрэг эрхлэх газар юм. Тэгэхээр өдгөөгийн Засгийн газрын хэрэг эрхлэх газар нь Монгол Улсын шинэ цагийн Засгийн газрын анхны шан таталцаж, тэргүүлэх үүрэг хүлээсэн байгууллага мөн билээ. Хүннү гүрний 2230, Их Монгол Улс байгуулагдсаны 815 жилийн түүхийг үргэлжлүүлж, үндэсний эрх чөлөөний хувьсгал, шинэ цагийн засгийн бүтэц байгуулагдсаны 110, ардчилсан хувьсгал мандасны 32 жилийн түүхийг тус тус бүтээж ирсэн Засгийн газрын хэрэг эрхлэх газар нь Монгол төрийн түүх юм. Өдгөө нэн шинэ цагийн түүхийг техник технологийн асар өндөр хурд, хүмүүсийн сэтгэлгээний тэс өөр орчинд бүтээж явна.

Өдгөө хэдхэн хоногийн дараа үндэсний эрх чөлөөний хувьсгалаа мандуулж, туурга тусгаар улс болсон өдөр тохиох гэж байна. Энэ л өдөр монголчууд Манжийн дарлалаар гарч, эрх чөлөөгөө эдэлсэн төдийгүй 10 жилийн дараа 1921 онд ардын хувьсгалтай золгосон цагаас эхлэн шинэ цагийн засаг улам бэхжсэн гэж үздэг.

Түмэн.мн