Ерөнхий сайд Оюун Эрдэнэ өвлийн олимпын нээлтэд очиж, Хятадад айлчилжээ. Хамтарсан мэдэгдлээс үзвэл айлчлал амжилттай болж, хоёр орны харилцааны тулгамдсан асуудлуудын талаар санал бодлоо солилцон зарим шийдэлд хүрсэн юм байна гэж ойлгов.

Монголын талаас Өвлийн олимпод хандсан хандлага их зөв байлаа. Харин хоёр талын хамтарсан мэдэгдэлд "Монголын тал нэг Хятад ын бодлогыг тууштай баримталж, Тайвань, Хонконг, Шинжаан, Төвөдтэй холбоотой асуудларх хятадын байр суурийг дэмждэгээ дахин нотлов" хэмээсэн нь ихээхэн эмзэг сонсдож байна. Бодлого гардаг агаад түүнийг үйл ажиллагаагаар хэрэгжүүлдэг нь чин үнэн юм.

Иймээс эл өгүүлбэр бас үйл ажиллагааг нь дэмждэг хэмээн ойлгогдоно. Энэ үүднээс авч үзвэл уг санаа ихээхэн ноцтой агаад мэдэгдэлд дурдагдсан субьектүүдийн урмыг хугалсан хэрэг болов. Нөгөө талаар энэ нь монголын зарчмын байр суурь уу гэсэн асуулт тавигдахад яалтгүй хүргэнэ. Тэгэхээр нэг Хятадын байр суурийг дэмждэгээ илэрхийлээд өөр асуудалд хутгалдан орох хэрэггүй байсан байж болох юм. Хамтарсан мэдэгдлийг тохиролцсон манай дипломат нөхдийн тайлбар их сонирхолтой байна. Ер нь сүүлийн үед Монгол Улсын үндэсний аюулгүй байдалтай холбогдох асуудалд яагаад их бүдүүн тоймоор хандах болов гэдэг асуудал хариулт хүлээж байна. Уг нь олон улсын ба хоёр талын харилцааны асуудалд зарчим дагах нь манай гадаад бодлогын нэг чухал чиглэл билээ. Анхаарахгүй хаяж үл болно. Ерөнхий сайдыг Хятад явахын өмнө талбай дээр "Монголыг Хятадтай нэгтгэх холбооныхон" гэж ёстой дуулдаагүй хүмүүс жагсаж харагдсан нь зарим асуудал бүр ил цагаандаа гарсныг гэрчилсэн шүү.

ОНЦ БӨГӨӨД БҮРЭН ЭРХТ ЭЛЧИН Т.ЗАЛАА-УУЛ