Эрүүл мэндийн салбарт төвлөрлийг арилгах шинэчлэлийн ажил хийгдсээр байгаа талаар Эрүүл мэндийн яамнаас мэдээллээ.
Энэ тухай ЭМЯ-ны Эмнэлгийн тусламж үйлчилгээний газрын дарга Ж.Нарангэрэл “Засгийн газар, Эрүүл мэндийн яамнаас эмнэлгийн тусламжийн төвлөрлийг бууруулах арга хэмжээг цогцоор нь хэрэгжүүлж байна.
Тухайлбал, 2021 онд нийт 19 аймагт компьютер томографын иж бүрэн аппаратыг суурилуулж, түүнд ажиллах шаардлагатай хүний нөөцийг бэлтгэн ажиллуулсан. Ингэснээр орон нутгийн иргэд хамгийн ойрын бүс нутагтаа компьютер томографын оношилгоо хийлгэх боломж бүрэн хангагдсан.
Үүнээс өмнө компьютер томографын оношилгоо хийлгэх заалттай иргэд заавал нийслэл болон төвлөрсөн газарт ирэх шаардлагатай байсан юм.
Тиймээс дээрх ажил нь эмнэлгийн тусламжийн төвлөрлийг бууруулах оновчтой шийдэл болсон юм.
Үүний дараа таван бүсийн оношилгоо эмчилгээний төв, нэг аймагт ангиограф буюу судас доторх оношилгоо эмчилгээ хийх иж бүрэн тоног төхөөрөмж суурилуулж, түүнийг ажиллуулах боловсон хүчнийг бэлтгэж байна.
Тодруулбал, манай улсад жилд 4,500-5,000 иргэн зүрхний шигдээс, тархинд цус харвах эмгэгээр эмнэлгийн тусламж авдаг.
Зүрхний шигдээс, тархинд цус харвах эмгэг нь шинж тэмдэг илэрснээс хойш яаралтай богино хугацаанд судсан доторх оношилгоо, эмчилгээ хийхийг шаарддаг. Гэвч ангиографын тусламжийг зөвхөн нийслэл хотод үзүүлж байсан аймгуудын иргэдэд замын зардал зэрэг санхүүгийн дарамтаас эхлээд хугацаа алдах хүртэл хүндрэл, дарамт учирч байв.
Харин үүнийг шийдвэрлэж, орон даяар ангиографын аппаратыг бүсчлэн байрлуулснаар эмнэлгийн тусламж үйлчилгээний чанарыг дээшлүүлж чадсан гэж бид үзэж байгаа.
Түүнчлэн хорт хавдар, зүрх судасны болон мэдрэлийн эмгэг, бодисын солилцооны зарим өвчнүүдийн үед шаардлагатай оношилгооны нэг арга бол ПЭТ компьютер томограф юм.
Тэгвэл манай улс 2021 оны наймдугаар сараас ПЭТ-КТ-ын тоног төхөөрөмж болон тухайн оношилгоонд шаардлагатай бодисын үйлдвэрийг хамт суурилуулсан. Ингэснээр тус оношилгооны заалтаар гадаад улсыг зорих иргэдийн урсгал багассан, үүнийг дагаад манай улсын анагаах ухааны салбарт тодорхой дэвшил авчирсан гэж үзэж байна.
Наймдугаар сараас хойш тус ПЭТ компьютер графын оношилгоогоор нийт 320 гаруй иргэн үйлчлүүлсэн байна" гэлээ.
