Өдгөөгөөс хэдэн жилийн өмнө “МАНАН” дэглэмийг устгаж, төрд шударга ёс тогтооно хэмээн эрх баригч намын гурван залуу гишүүн, АН-ын хоёр нөхөртэй нэгдэн, хөхөө өвлийн хүйтнээр сүржигнэж байв. Тэр цагаас хойш шударга ёс ч тогтсонгүй, МАНАН дэглэм ч устаж алга болсонгүй. Гагцхүү эрх баригч намын гурван тэмцэгч залуу Ерөнхий сайд, Хууль зүй, дотоод хэргийн сайд, УИХ-ын дэд дарга болсноор чимээ намдааж дээ.

Хамгийн сүүлчийн жишээ гэхэд Төв аймгийн Засаг дарга Д.Мөнхбаатар 2020 оны орон нутгийн Иргэдийн төлөөлөгчдийн хурлын сонгуулиар Батсүмбэр сумаас сонгогдсон төлөөлөгч Дэнзэнгийн Ганболдыг сумын Засаг даргаар томилуулахаар дайрч байгаад томилжээ. Дашрамд дурдахад Д.Мөнхбаатар нь аймгийн Засаг дарга болсон цагаас хойш дээрээ төргүй, дэргэдээ ард түмэнгүй мэт аашилж, өөрийн танил тал, ахан дүүсийн хүрээнд томилгоо хийхээс эхлээд эрүүгийн хэрэгт татагдаад байгаа нөхрийг хүртэл сумын Засаг даргаар томилон, эрээ цээрээ алдан сууна. Саяхан гэхэд өөрийг нь аймгийн Засаг даргад дэмжсэн УИХ-ын гишүүн Ж.Батжаргалын ахан дүүс, амраг садангаас эхлээд төрийн албанд томилоход гүүр болсон гэх мэдээ цацагдаж эхэлсэн. Тэрбээр ийнхүү төрийн албанд байгаа ургийн модыг нь хүртэл зурсан харагдана лээ.

Уг нь Д.Ганболдыг сумын Засаг даргаар томилох, эс томилох асуудал ярьж эхлэх үед АТГ-аас аймгийн Засаг дарга Д.Мөнхбаатарт албан тоот хүргүүлжээ. Тодотговол, АТГ-ын Хяналт шалгалт дүн шинжилгээний хэлтэст хандахад Д.Ганболдын “хахууль авах үйлдлийг нь тус газраас мөрдөн шалгах ажиллагаа явуулж, Төв аймгийн Прокурорын газраас Эрүүгийн хуулийн тусгай ангийн 22 дугаар зүйлийн 22-ын 4-ийн 2 дахь хэсэгт зааснаар эрүүгийн хэрэг үүсгэн яллагдагчаар татагдсан” хэмээн 2020 оны арваннэгдүгээр сарын 25-ны өдөр №05/13089 тоот албан бичгийг хүргүүлжээ. Өөрөөр хэлбэл “авлига авсан хэргээр шалгагдаж байгаа хүнийг удирдах албанд буюу төрийн албанд томилж болохгүй” гэх албан бичгийг хууль хяналтын байгууллагаас хүргүүлсэн хэрэг шүү дээ.

Гэтэл хууль хамаардаггүй Засаг ноён Д.Мөнхбаатар Д.Ганболдыг сумын Засгаар хүч түрэн томилсон байдаг. Үүний дараа Д.Ганболдыг Төв аймгийн Шүүхээс баривчилж хорьсон гэдгийг ч уншигч олон мэдэж байгаа. Ийнхүү Д.Ганболд нэг жил гаруй хоригдоод Цагаан сарын өмнөхөн суллагдсан ч дахин сумын Засаг даргаар томилсон байна. Төв аймгийн Засаг дарга Д.Мөнхбаатар гэж нэг ийм нөхөр авлигын хэргээр ял эдэлсэн нөхрийн албан тушаалыг хадгалж байгаад ялаа дуусгахаар нь томилчихож байна. Уг нь түүнийг шударга ёс ярьсан Ерөнхий сайд өөрөө батламжилсан баймаар юм.