Б.Баасанцогт гэж хэн бэ. Нэгэн хотхоны орон сууцанд хуульчдыг цуглуулж, биеэ үнэлэгчдийг авчирч архидан согтуурдаг Б.Баасанцогт, түүний хамсаатнуудын лифтэн дэх бичлэг нийтэд ил болсноор тэд нийгэмд танигдсан. Тэрбээр энэхүү орон сууцандаа шүүгчдийг архидуулж, дуулиант гэмт хэргийг хэрхэн шийдвэрлэх схем зохион, түүнийхээ дагуу хөдөлгөдөг байсан нь нийгмийг цочирдуулсан билээ. Тухайлбал, 60 тэрбумын схем, Б.Хурц, Э.Бат-Үүл, С.Баяр, С.Баярцогт, Ерөнхий сайд асан Ж.Эрдэнэбат нарт холбогдох хэрэгт шүүгчдийг гар, хөлөө болгон, хэргийн хувь заяаг хүссэнээрээ эргүүлж ирсэн байдаг.

Ерөнхийлөгчийн Тамгын газрын төлөөлөгч гэх үнэмлэхтэй, өмгөөлөгч гэх албан ёсны хаягтай Б.Баасанцогт энэ хэрээрээ олон хуульчийг хөлдөө чирсэн. Түүнтэй хамт архидан согтуурч, схем зохиолцох үйлдэлд гар бие оролцсон Сүхбаатар дүүргийн Эрүүгийн хэргийн анхан шатны шүүхийн шүүгч асан З.Болдбаатар, Сүхбаатар дүүргийн Эрүүгийн хэргийн анхан шатны шүүхийн шүүгч асан Х.Идэр, Булган аймгийн Сум дундын шүүхийн шүүгч асан Д.Отгонбаатар, АТГ-ын комиссараар ажиллаж байсан П.Чулуунбаатар, Нийслэлийн прокурор асан Ш.Нямдорж, анхан болон давж заалдах шатны 11 шүүгч гээд цааш уртаас урт үргэлжилнэ.

Б.Баасанцогтын хувьд авлигын мөнгийг гарын салаагаар цацдаг нэгэн. Үүнд нь, Цэцийн гишүүн, ҮАБЗ-ийн нарийн бичгийн дарга, түүний ах болон эхнэр, Ерөнхийлөгч асан Х.Баттулгын туслах, Дээд шүүхийн болон давж заалдах шатны шүүгчид, иргэн Б.Сүнээ, ТЕГ, АТГ-ын ажилтан зэрэг хууль, хүчний байгууллагад өндөр албан тушаал хашдаг эрхмүүд холбогддог.

Дээрх үйлдэлд нь Б.Баасанцогтын өмгөөллийн эрхийг хоёр жилээр хассан ч тэрбээр эсэргүүцэн давж заалдсан ч тусыг олоогүй билээ. Хуулийн салбарынхныг дохиогоороо хөдөлгөж, авлигын мөнгийг хэдэн саяар өдөрт шилжүүлж суудаг ажилтай Б.Баасанцогтын өмнөх дуулиан намжаагүй байтал түүнтэй холбоотой маш ноцтой нэгэн мэдээллийг Тагнуулынхан өнөөдөр өглөө.

ТЕГ-ынхан улсын онц чухал обьектууд болон нэр бүхий улстөрчид рүү халдахаар зэхэж байсан таван хүнийг баривчлан саатуулсан талаараа мэдээлсэн. Гэтэл энэ дунд аанай л Б.Баасанцогтын нэр явна. Тодруулбал, 831 төрлийн галт зэвсэг, буу, сум хураан авсны дотор түүний эзэмшлийн, нэр дээр нь бүртгэлтэй галт зэвсгүүд байсан нь ийн саатуулах шалтгаан болжээ.

Үүнээс ахин дахин ер нь Б.Баасанцогт гэгч хэн юм гэх асуулт урган гарч байна. Хамаг муу муухай бүхнийг сэдэж, зохион байгуулж, бусдыг авлигаар үүндээ татан оролцуулж, нэр хүндийг нь шавар шалбаагтай хутгадаг тэрбээр энэ удаад ч онц ноцтой хэрэгт холбогдлоо. Өмнөх олон хэрэгт нь түүнийг шалгаж байгаа ч саатуулаагүй нь олны шүүмжлэлд өртөж байсан. Харин энэ удаад нүгэл нүдээрээ гарна гэгч боллоо.