Засгийн газар, Монголбанк гадаад валют, тэр дундаа ам.долларын нөөцийг нэмэгдүүлэх цогц арга хэмжээ авч байна. Засгийн газрын зүгээс төрийн оролцоотой компаниудад гадаад худалдаагаа ам.доллараар хийж Монголбанкинд доллар төвлөрүүлэх чиглэл өгчээ. Тухайлбал, “Эрдэнэс Тавантолгой” ХХК, “Эрдэнэт” үйлдвэр ТӨҮГ, “Оюутолгой” ХХК зэрэг томоохон компаниудад хандсан байна.

Энэ дагуу “Эрдэнэс Тавантолгой” ХХК гэхэд өнгөрсөн сард Монголбанкинд 129 сая ам.доллар төвлөрүүлсэн бол энэ сард 150 сая ам.доллар төвлөрүүлэхээр төлөвлөжээ. “Оюутолгой” ХХК, "Эрдэнэт" ТӨҮГ нийлээд дөрөвдүгээр сард 1 тэрбум орчим ам.доллар Монголбанкинд төвлөрүүлэх тооцоо гарсан байна. Богино хугацаанд төв банкинд долларын зузаатгал хийхийн тулд аж ахуй нэгжүүдийн экспортын орлогыг мөн урьдчилж ам.доллараар авах хэлцэл, тохиролцоог хийгээд байгаа юм.