Улаанбаатар хотод 2022 оны 3 дугаар сард хэрэглээний сагсны 344 нэрийн бараа, үйлчилгээний 33.1 хувь буюу 114 бараа, үйлчилгээний үнэ өмнөх сараас өссөн бол 8.1 хувь буюу 28 бараа, үйлчилгээний үнэ буурч, 58.7 хувь буюу 202 бараа үйлчилгээний үнэ өөрчлөлтгүй байгааг Үндэсний Статистикийн Хороо мэдээллээ.

Энэ оны 2 болон 3 дугаар сард судалгаанд сонгогдсон хүнсний 100 нэрийн бараанаас 52 нэрийн барааны үнэ нэмэгджээ. Үүнээс хүнсний гол бүтээгдэхүүн махны үнийн өсөлтийг харуулав.

Улаанбаатар хотод худалдаалагдаж буй үхрийн цул нэг килограмм махны дундаж үнэ өнгөрсөн гуравдугаар сард 16,354 төгрөг болж, өмнөх сараас 1.6 хувь буюу 254 төгрөгөөр өссөн бол үхрийн ястай нэг килограмм махны дундаж үнэ 14,255 төгрөг болж өмнөх сараас 1.8 хувь буюу 257 төгрөгөөр өссөн байна.

Харин хонины ястай нэг килограмм махны дундаж үнэ гуравдугаар сард 12,585 төгрөг болж өмнөх сараас 5.4 хувь буюу 646 төгрөгөөр нэмэгджээ.